<p style="text-align: justify;">مزارشریف (پژواک، ۲ سلواغه ۱۴۰۲): په بلخ ولایت کې د څلورو ولایتونو په کچه د فوټبال پيل شوې سیالۍ د هرات لوبډلې په بریا پای ته ورسېدې.</p>
<p style="text-align: justify;">د بلخ د فوټبال فدراسيون مشر احمدالله واعظزاده وايي، دغه سيالۍ چې لس ورځې مخکې د ورزش د ودې او د ورزشکارانو مهارتونو شريکولو په موخه پيل شوې وې، پرون ماښام د هرات «اټک انرژۍ» په بریا او اتلولۍ پای ته ورسېدې.</p>
<p style="text-align: justify;">واعظزاده زیاتوي چې په یادو سیالیو کې د بلخ، هرات، سمنګان او جوزجان ولایتونو د فوټبال شپږ لوبډلو شاوخوا لس ورځې له یو بل سره سیالۍ وکړې.</p>
<p style="text-align: justify;">د بلخ د فوټبال مسوولينو د معلوماتو له مخې، په دغو سياليو کې د هرات په استازيتوب د "اټک انرژۍ" فوټبال لوبډله وتوانېده چې د پنځو برياوو او ١٥ نومرو په لرلو سره د اتلولۍ جام خپل کړي.</p>
<p style="text-align: justify;">په همدې حال کې يو شمېر ورزشکاران د دې ډول سياليو ترسره کېدو هرکلى کوي او له سرپرست حکومته غواړي چې د دوى لپاره د ورزش لا ډېر فرصتونه برابر کړي.</p>
<p style="text-align: justify;">سلیمان سخي د دې ډول لوبو له ترسراوي هرکلی کوي او له سرپرست حکومته غوښتنه کوي چې ورزشکارانو ته د ورزش برخه کې ډېر فرصتونه برابر کړي.</p>
