<p style="text-align: justify;">کابل (پژواک، ۹ سلواغې ۱۴۰۲): د بهرنیو چارو وزارت سرپرست د «افغانستان د سیمهییزې همکارۍ ابتکار» غونډه کې وویل، اسلامي امارت د نورو هېوادونو حکومتولۍ جوړښتونو ته درناوی لري او له نورو هم تمه لري چې د اسلامي امارت حکومتولۍ جوړښت ته درناوی وکړي.</p>
<p style="text-align: justify;">نن کابل کې د ګاونډیو او سیمهییزو هېوادونو ځانګړو استازو او سفیرانو په ګډون «افغانستان د سیمهییزې همکارۍ ابتکار» تر عنوان لاندې غونډه جوړه شوه.</p>
<p style="text-align: justify;">په دغه غونډه کې د افغانستان د بهرنیو چارو سرپرست وزیر مولوي امیرخان متقي وویل چې افغانستان له هېڅ لوري سره ناندرۍ نه غواړي او تل یې پر مثبت تعامل ټینګار کړی دی.</p>
<p style="text-align: justify;">هغه وویل چې اسلامي امارت د نورو هېوادونو حکومتولۍ جوړښتونو او پرمختیایي ماډلونو ته درناوی لري او له نورو هم تمه لري چې د اسلامي امارت حکومتولۍ او پرمختګ ماډل ته درناوی وکړي.</p>
<p style="text-align: justify;">هغه زیاته کړه چې د اسلامي نظام د حاکمیت او خپلواکۍ د تر لاسه کولو لپاره له شل کلنې مبارزې وروسته خپل برخلیک خپله ټاکي د افغانستان تاریخ ثابته کړې، چې تحمیلي نسخو او طرحو د افغانستان درد نه دی دوا کړی او برعکس پایله یې لرلې ده.</p>
<p style="text-align: justify;">د هغه په خبره، اسلامي امارت چمتو دی، چې د متقابل احترام په پام کې نیولو سره د سیمې له هېوادونو سره ګډ کار، مثبت تعامل او همکاري وکړي.</p>
