فاریاب کې دوو نجونو ځان‌وژنه کړې او څلور نور کسان ټپیان شوي

میمنه (پژواک، ۱۲ سلواغه ۱۴۰۲): فاریاب کې ځایي سرچینې د دغه ولایت په اندخوی ولسوالۍ کې د یوې ۱۷ کلنې نجلۍ له ځان‌وژنې او دغه راز په دولت‌اباد ولسوالۍ کې د دوو قومونو ترمنځ د نښتې په پایله کې د څلورو کسانو له ټپي کېدو خبر ورکوي.

د فاریاب د اطلاعات او فرهنگ رییس مولوي شمس‌الدین محمدي وویل چې د کبرا په نوم یوې ۱۷ کلنې نجلۍ تېره ورځ غرمه د اندخوی ولسوالۍ په سلدوز کلي کې د کوټې چت په پکه پورې ځان راځوړند کړی او ژوند ته یې د پای ټکی ایښی دی.

نوموړي زیاته کړه چې د یادې نجلۍ د ځان‌وژنې انګېزې روښانه کېدو لپاره څېړنې روانې لري.

د حکومتي سرچینو او ځايي خلکو معلوماتو له مخې، د اندخوی ولسوالۍ په ینګي‌تیګیرمان کلي کې د نجلا په نوم یوه ۲۶ کلنې نجلۍ د کورنۍ ستونزو له امله ځان راځوړند کړی او ځان یې وژلی دی.

ورته مهال، د فاریاب ولایت مقام ویاند مفتي عصمت‌الله مرادي وايي چې نن سهار د دغه ولایت دولت‌اباد ولسوالۍ کې د دوو قومونو ترمنځ فزیکي نښته کې له دواړو خواوو څلور کسان ټپیان شوي دي.

د دولت‌اباد ولسوال ملا سیف‌الله له پژواک خبري اژانس سره په خبرو کې وویل چې دوه قومونه خیراباد کلي کې پر یوه لاره حقوقي دعوه لري چې د فزیکي نښتې لامل شوې او پایله کې څلور کسان د چاقو په وسیله ټپیان شوي دي.

هغه زیاته کړه چې ټپیان د ولسوالۍ کلینیک ته لېږدول شوي او پېښه تر څېړنو لاندې ده.