پلعلم (پژواک، ۲۴ سلواغه ۱۴۰۲): د لوګر پوهنې ریاست وایي چې سږ کال د دغه ولایت د مرکز پلعلم په ګډون د پنځو ولسوالیو د سواد زدهکړو له ۷۴ ټولګیو ۱۳۷۰ کسان فارغ شوي دي.
د لوګر پوهنې ریاست ویاند شاهپور عرب پژواک خبري اژانس ته وویل چې نن یاد کسان په مرکز پلعلم، محمداغه، خوښۍ، برهکيبرک، څرخ او خروار ولسوالیو کې د پوهنې وزارت د سواد زدهکړو پروګرام له کورسونو فارغ شوي دي.
عرب زیاته کړه: «یادو کسانو ته د نهو میاشتو په موده کې په ۷۴ کورسونو کې د سواد زدهکړې ورکړل شوې چې په کې ۷۱۴ نارینه او ۶۵۶ ښځینه زدهکوونکي شامل دي.»
نوموړی زیاتوي، فارغو کسانو ته د درېیم ټولګي معادل اسناد هم ورکړل شوي څو له مخې یې د زدهکړو دوام لپاره په ښوونځیو کې شامل شي.
د مرکز پلعلم یوه ۳۸ کلن اوسېدونکي رحیمالله پژواک ته وویل، خوښ دی چې په تېر یوه کال کې یې د سواد زدهکړو برخه کې لیک لوست وکړ.
هغه وایي: «زه د جګړو او اقتصادي ستونزو له امله له زدهکړو محروم شوی وم، تېر کال د پوهنې وزارت له لوري د سواد زدهکړو پیل شوي پروګرام کې مې داخله وکړه، په یوه کال کې مې ډېر څه زده کړي، خپل مشکلات پرې حل کولای شم.»
دا په داسې حال کې ده چې تېره اونۍ هم د (یونسکو) په مالي ملاتړ په مرکز پلعلم او بېلابېلو ولسوالیو کې ۱۰۲۴ کسان د سواد زدهکړو له یو کلن پروګرامه فارغ شول.
GET IN TOUCH
NEWSLETTER
SUGGEST A STORY
PAJHWOK MOBILE APP