ننګرهار کې د دوو کورنيو ترمنځ شخړه کې شپږو کسانو ته مرګ‌ژوبله اوښتې

<p style="text-align: justify;">جلال‌اباد (پژواک، ۲۶ کب ۱۴۰۲): د ننګرهار امنیه قومانداني وايي، د دغه ولايت په دره‌نور ولسوالۍ کې د دوو کورنيو ترمنځ د شخړې له امله درې کسان وژل شوي او درې نور ټپیان دي.</p>

<p style="text-align: justify;">مسوولين وایي، دا شخړه تېره ورځ د روژه ماتي پرمهال د ځمکې پر سر د جنجال له امله رامنځته شوې ده.</p>

<p style="text-align: justify;">د ننګرهار ولايت د امنيه قوماندانۍ وياند عبدالبصير زابلي د کب په ۲۶مه پژواک خبري اژانس ته وويل، پرون ماښام د دره‌نور ولسوالۍ املې کلي کې د دوو کورنيو ترمنځ د ځمکې پر سر نښته شوې ده.</p>

<p style="text-align: justify;">هغه زياته کړه، دواړو خواوو پر يو بل ډزې کړې چې له امله يې درې کسان وژل شوي او د يوې ښځې په ګډون درې نور ټپيان دي.</p>

<p style="text-align: justify;">د نوموړي د معلوماتو له مخې، پنځه کسان د يوې کورنۍ دي او یو ټپي د بلې کورنۍ دی چې ځینې ښکېل کسان د امنيتي مسوولينو لخوا نيول شوي دي.</p>

<p style="text-align: justify;">هغه وايي، پېښې سره سم د يادې ولسوالۍ د امنيه قوماندانۍ منسوبينو پر وخت ځانونه سیمې ته رسولي او ټپيان يې د درملنې په موخه حوزوي روغتون ته لېږدولي دي.</p>

<p style="text-align: justify;">د سيمې يو اوسېدونکی مطيع‌الله وايي چې دواړه اړخونه خپلو کې د تره زامن دي او له ډېرې مودې راهیسې يې په ځمکه لانجه وه چې په دې وروستيو کې يې موضوع محکمې ته رسېدلې وه.</p>

<p style="text-align: justify;">د ننګرهار د امنیتي مسوولینو د معلوماتو له مخې، د پېښې د يو اړخ ډېر کسان چې لومړی يې بريد هم کړی له سيمې تښتېدلي خو د نيولو هڅې يې روانې دي.</p>