کابل (پژواک، ۳ وری ۱۴۰۳): د اطلاعاتو او فرهنګ وزارت وایي چې د عینک مسو کان د قراردادی شرکت نوي مشر د دغه وزارت د فرهنګ او هنر له معین سره په لیدنه کې ویلي چې د عینک مسو کان د کیندنې پروژه د تاریخي اثارو د خوندیتوب په پام کې نیولو سره پیلېږي.
د اطلاعاتو او فرهنګ وزارت پر خپله ایکسپاڼه لیکلي چې د دغه وزارت د فرهنګ او هنر معین مولوي عتیق الله عزیزي د عینک مسو کان د کیندنې مسوول شرکت له نوي مشر سونګ ون بینګ سره لیدلي دي.
سرچینه زیاتوي چې دغه لیدنه کې د عینک مسو کان قراردادي شرکت نوي مشر ویلي چې د عینک مسو کان تاریخي اثار نه یوازې د افغانستان، بلکې د ټول بشریت پانګه ده.
نوموړي ډاډ ورکړی چې کاري ساحه کې به د تاریخي اثارو خوندیتوب ته جدي پاملرنه ولري.
بینګ ویلي چې د عینک مسو کان د کیندنې طرحه د چین د حکومت له خوا منظور شوې او د فرهنګي بنسټونو په همکارۍ د دې طرحې په پلې کېدو کار کوي څو تاریخي اثار تخریب نه شي.
نوموړي دا طرحه د تاریخي اثارو د مصونیت لپاره ګټوره وبلله .
د عینک مسو کان د لوګر ولایت په محمداغې ولسوالۍ کې موقعیت لري چې د افغانستان په کچه ترټولو لوی او د نړۍ په کچه دویم لوی کان ګڼل کېږي.
دا په داسې حال کې ده چې د دغه کان د استخراج تړون په ۲۰۰۸ کال کې د مخکني حکومت له خوا له یوه چینایي شرکت سره لاسلیک شو.
