بدخشان کې یوې چاپي رسنۍ فعالیت پیل کړ

فیض‌اباد (پژواک، ۱۴ وری ۱۴۰۳): د بدخشان په مرکز فیض‌اباد ښار کې د «اطلاعات شهر» په نوم یوه میاشتنۍ جوړه او په رسمي توګه یې فعالیت پیل کړ.

د «اطلاعات شهر» میاشتنۍ مسوول مدیر فخرالدین قاري‌زاده وايي، یاده رسنۍ یې په شخصي امکاناتو رامنځته کړې او په پام کې لري چې هره میاشت یې څلورو پاڼو کې دوه زره نسخې چاپ کړي.

هغه دغه‌راز زیاتوي، یاده میاشتنۍ یې د معیاري خبریالۍ دودولو، دقیق راپور ورکولو او د چارو مسوولینو ته د خلکو د اړتیاوو او ستونزو رسولو په موخه جوړه کړې ده.

هغه زیاتوي، دا لومړنۍ رسنۍ ده چې د اسلامي امارت له بیاځلي واکمنېدو وروسته په بدخشان کې رامنځته شوې او د لوستو او تجربه‌لرونکو ځوانانو په مرسته د معیاري خبریالۍ دودولو، د یو بل منلو د فرهنګ بنسټیزکولو او د خلکو د اړتیاوو او ستونزو د انعکاس لپاره به خپل فعالیت ته دوام ورکړي.

د بدخشان د اطلاعات او فرهنګ رییس انجینیر ذبیح‌الله امیري وايي، دغه ریاست د اسلامي امارت د پالیسۍ مطابق تل هڅه کوي څو د ځایي رسنیو او خبریالانو ملاتړ وکړي او دغه ولایت کې د رسنیزو کارونو ادامې او د ژورنالیستانو ودې لپاره فرصتونه ډېر کړي.

هغه زیاتوي، اوسمهال دغه ولایت کې ۱۶ رسنۍ فعالیت کوي چې په دې کې ۱۱ غږیزې رسنۍ چې دوه یې د ښځینه‌وو ځانګړې رسنۍ دي، درې انځوریزې رسنۍ او دوه چاپي رسنۍ شاملې دي خو د معلوماتو له مخې، ځینو چاپي رسنیو د کرونا ویروس له خپرېدو وروسته او د اسلامي امارت بیاځلي واکمنېدو وروسته د مالي امکاناتو نشتون له امله فعالیت بند کړی و.

هغه دغه‌راز د بدخشان له خبریالانو غواړي چې د اسلامي ارزښتونو په ساتنې سره او د خبریالۍ اصولو ته په کتو خلکو ته د عامه‌پوهاوی فعالیتونه ترسره کړي، د خلکو او حکومت ترمنځ د یوه ارتباطي پل په څېر اوسي، د دروغو اوازې چې د افغانستان د خلکو د ګټو پر خلاف دي، خنثی کړي.

ورته مهال، د خبریالانو د ملاتړکوونکو بنسټونو یو شمېر استازي فیض‌اباد ښار کې د «اطلاعات شهر» په نوم میاشتنۍ جوړېدل یو نیک اقدام ګڼي او له ټولو دولتي او خصوصي نهادونو غواړي چې د محلي رسنیو او خبریالانو ملاتړ وکړي.

د ازادو ژورنالستانو د اتحادیې ولایتي مسوول معراج‌الدین رحیمي هیله‌مند دی چې د یادې چاپي رسنۍ مسوولین د خبریالۍ اصولو او پالیسۍ ته په کتو د دغه ولایت د اطلاعاتو او فرهنګ ریاست، د خبریالۍ د بنسټونو مسوولینو او رسنیو په همغږئ خپلو مثبتو او اغیزناکه فعالیتونو ته ادامه ورکړي.