<p style="text-align: justify;">کابل (پژواک، ۱۵ وری ۱۴۰۳): ترکي چارواکي وايي، د ترکيې استانبول ښار په یوه نایټ کلپ کې د اورلګېدنې له امله ۲۹ کسانو خپل ژوند له لاسه ورکړی او درې نور ټپيان شوي دي.</p>
<p style="text-align: justify;">د ترکيې دولتي اژانس انادولو د استانبول ولایت مقام خبرپاڼې پر مټ ليکلي چې دا اورلګېدنه پرون له غرمې وروسته د استانبول ښار د «بشیکتاش» سيمه کې د یوې ۱۶ پوړيزې ودانۍ تکاوي کې رامنځته شوې خو لامل يې نه دی څرګند.</p>
<p style="text-align: justify;">سرچينې زياته کړې چې په اورلګېدنه کې ۲۹ کسان مړه او درې نور ټپيان شوي دي.</p>
<p style="text-align: justify;">د استانبول ښاروال داوت ګل رسنيو ته ویلي، فکر کېږي وژل شوي کسان د کلب بیارغونې په چارو بوخت وو.</p>
<p style="text-align: justify;">هغه زياته کړې، د پېښې په تړاو څېړنې پیل شوې، د کلب مدیر او د رغونې چارو د مسوول د نیولو امر هم شوی دی.</p>
