<p style="text-align: justify;">شبرغان (پژواک، ، ۲۰ غویی ۱۴۰۳): د جوزجان مرکز شبرغان ښار کې یوې مېرمنې د یوه کورس په جوړولو سره ۱۰۰ نجونو ته له شپږم ټولګي پورته د زدهکړو زمینه برابره کړې، دغه کورس کې شاملې نجونې له حکومت غواړي چې د دوی انتظار دې پای ته ورسوي او پر مخ یې دې ښوونځي پرانیزي.</p>
<p style="text-align: justify;">د یادونې ده، د ۱۴۰۰ کال د زمري میاشتې په ۲۴مه د اسلامي امارت له بیا واکمنېدو وروسته نجونې له شپږم ټولګي پورته ښوونځیو او له هغه وروسته پوهنتونونو ته له تلو منع شوې.</p>
<p style="text-align: justify;">دغه مېرمن سنګيماه نومېږي او د جوزجان مرکز شبرغان ښار کې یې ۱۰۰ نجونو ته له شپږم ټولګي پورته د ښوونځيو مضمونونو او قران کریم زدهکړې زمینه برابره کړې.</p>
<p style="text-align: justify;">هغې پژواک ته وویل: «ما په خپل شخصي لګښت دا دوه برخې جوړې کړې او کومې نجونې چې دلته درس وایي ډېری یې د خپلې کورنۍ نفقه ګټونکې دي.»</p>
<p style="text-align: justify;">نوموړې وویل: «درې میاشتې کېږي چې دغه کورس مې جوړ کړی، تر اوسه د هیڅ بنسټ له خوا زما ملاتړ نه دی شوی، زموږ یوازېنۍ ستونزه د زدهکوونکو لپاره درسي توکي برابرول دي، ځيني وخت نه شو کولای چې دوی ته کتاب او کتابچې برابرې کړو او یا قرانکریمونه هدیه کړو.»</p>
<p style="text-align: justify;">سنګيماه وایي که له دوی ملاتړ وشي، ښایي وتوانیږي چې ډېرې نجونې جذب کړي.</p>
<p style="text-align: justify;">هغې وویل: «که موسسې او خلک له موږ سره د درسي توکو مرسته وکړي، موږ کولی شو چې دغو دوو برخو ته ډېرې نجونې جذب کړو، ډېرې نجونې لېواله دي چې راشي او درس ووایي، خو د ځای او درسي توکو نشتون له امله نه شو کولی چې هغوی جذب کړو.»</p>
<p style="text-align: justify;">د یاد کورس یوه ښوونکې نورضیا سلیمي وایي چې دغه کورس کې د نورو مضمونو ترڅنګ نجونو ته نوراني قاعده، قران کریم او اسلامي کتابونه هم تدریس کېږي.</p>
<p style="text-align: justify;">نوموړې وویل چې دې کورس کې ډېری شاملې نجونې له بېوزله کورنیو دي چې ان د قرطاسیې اخیستو وس نه لري، که د کوم بنسټ له خوا دغه کورس سره مرسته وشي، د دې ترڅنګ چې زدهکوونکو ته به قرطاسیه ورکړل شي، د جذب شمېر به هم لوړ شي.</p>
<p style="text-align: justify;">دې کورس کې چې کومې نجونې پر زدهکړو بوختې دي، خپل راتلونکي لپاره هیله لري او له حکومته غواړي چې نجونو ته دې د ښوونځیو دروازې پرانیزي.</p>
<p style="text-align: justify;">د دغه کورس یوه زدهکوونکې رویا چې د نجونو پرمخ له شپږم ټولګي پورته د ښوونځیو له بندېدو مخکې د اتم ټولګي زدهکوونکې وه، د دغه کورس له جوړېډو هرکلی کوي او وایي چې نجونې په ډېره لېوالتیا دغه ځای کې پر زدهکړو بوختې دي، خو هیله لري چې ډېر ژر دوی ته ښوونځيو ته د تلو اجازه ورکړل شي.</p>
<p style="text-align: justify;">نوموړې وایي: «له حکومته غواړم چې زموږ ښوونځي دې بېرته پرانیزي، انتظار ډېر سخت دی.»</p>
<p style="text-align: justify;">نوموړې دغهراز له مرستندویه بنسټونو غواړي چې له دغه کورس څخه ملاتړ وکړي څو ډېرې نجونې جذب شي.</p>
<p style="text-align: justify;">ورته وخت کې، دغه کورس کې یو بله زدهکوونکې صاحبه وایي، دغه کورس کې ورته په وړیا ډول د زدهکړې زمینه برابره شوې ده.</p>
<p style="text-align: justify;">هغې وویل: «ډېره خوشحاله یم چې دغه زمینه برابره شوه او خپلو درسونو ته دوام ورکوم، دې کورس کې چې کومې نجونې درس وایي ډېری یې د بېوزله کورنیو او د خپلې کورنۍ نفقه ګټوونکي دي.»</p>
<p style="text-align: justify;">نوموړې هم د نجونو پرمخ د ښوونځیو درازو پرانیستلو غوښتنه کوي، وایي: «موږ نجونې حاضرې یو چې د اسلامي شریعت مطابق شرعي حجاب مراعت کړو، ښه باستره جامې واغوندو او ښوونځیو ته لاړې شو او زدهکړه وکړو.»</p>
<p style="text-align: justify;">دا په داسې حال کې ده چې له دې مخکې د بېلابېلو ولایتونو نجونو د ښوونځيو پرانیستلو غوښتنه کړې وه.</p>
<p style="text-align: justify;">د اسلامي امارت چارواکو په وار - وار ویلي چې د اسلامي شریعت په چوکاټ کې د ښځو حقونو په ځانګړي ډول د تعلیم حق تامینولو ته ژمن دي او نجونو پرمخ د ښوونخيو پرانیستلو پر یوې طرحې کار کوي.</p>
