فاریاب کې د ترافیکي پېښې له امله درې کسان مړه شوي

میمنه (پژواک، ۳۰ غویی ۱۴۰۳): فاریاب کې ځايي سرچینې وايي چې په دغه ولایت کې د ترافیکي پېښې له امله درې ځوانان مړه شوي دي.

د فاریاب د اطلاعات او فرهنګ رییس مولوي شمس‌الدین محمدي پژواک خبري اژانس ته وویل، یاده پېښه تېره شپه شاوخوا لس بجې د دغه ولایت د شېرین‌تګاب ولسوالۍ پر نمبر۱ لویه‌لار د یوه کاماز موټر او موټرسایکل د ټکر له امله شوې ده.

هغه زیاته کړه، په دې پېښه کې پر موټرسایکل سپاره درې ځوانان مړه شوي دي.

ورته مهال، د فاریاب د ترافیکي حادثاتو مدیر احمدفهیم کوهي یاده پېښه تایید کړه ویې ویل: «د پېښې قربانیان جان‌اغا، احمدخالد او حاجی‌محمد چې له ۱۸ تر ۲۵ کلونو عمرونه یې درلودل، د شېرین‌تګاب ولسوالۍ د اسلام‌کلا سیمې اوسېدونکي وو.»

د پېښې عیني شاهد او د تاش‌کلا سیمې اوسېدونکي ادریس وویل: «د شپې لس بجې هوا توپاني وه، درې ځوانانو چې غوښتل یې په بېړه له عمومي سړکه تېر شي، له یوه کاماز موټر سره ټکر وکړ.»