مولوي عبدالکبیر: هېڅوک حق نه لري چاته د تېرو کړنو له امله ګوته ونیسي

<p style="text-align: justify;">کابل (پژواک، ۵ زمری ۱۴۰۳): د ریاست‌الوزرا سیاسي مرستیال وايي، اسلامي امارت به هېڅکله هم له خپل ملت سره خیانت ونه کړي او هېڅوک حق نه لري چاته د تېرو کړنو له امله ګوته ونیسي.</p>

<p style="text-align: justify;"> له ارګه په خپره شوې خبرپاڼه کې راغلي چې د ریاست‌الوزرا سیاسي مرستیال مولوي عبدالکبیر یادې څرګندونې تېره ورځ په خپل کاري دفتر کې د تېر حکومت له یو شمېر والیانو سره په لیدنه کې وکړې.</p>

<p style="text-align: justify;">خبرپاڼه کې راغلي، راغلو پخوانيو والیانو د اسلامي امارت د پالیسیو ستاینه وکړه، د هېواد په روان وضعیت یې خوښي وښوده او د دوام لپاره يې د هر اړخیزې همکارۍ ژمنه وکړه.</p>

<p style="text-align: justify;">د خبرپاڼې په حواله، د ریاست‌الوزرا سیاسي مرستیال په دغه لیدنه کې وویل، افغانستان د ټولو افغانانو شریک کور، اسلامي امارت یې شریک نظام دی او له تبعيض پرته د اسلامي امارت دروازې د ټولو افغانانو پر مخ خلاصې دي.</p>

<p style="text-align: justify;">نوموړي زیاته کړه، اسلامي نظام د افغانستان د مجاهد ولس په سرښندنو راغلی، نو اسلامي امارت به هېڅکله هم له خپل ملت سره خیانت ونه کړي.</p>

<p style="text-align: justify;">د ریاست‌الوزرا سیاسي مرستیال دغه‌راز ویلي، اسلامي امارت په افغانستان کې عمومي عفوه اعلان کړې، هېڅوک حق نه لري چاته پېغور ورکړي یا د تېرو کړنو له امله چاته ګوته ونیسي.</p>

<p style="text-align: justify;">مولوي عبدالکبیر د خپلو خبرو په پای کې پر ټولو بهر مېشتو هېوادوالو غږ وکړ چې بېرته خپل هېواد ته راستانه شي او دلته په عزت ژوند وکړي.</p>