ننګرهار کې د ترافيکي پېښې له امله ۷ کسانو ته مرګ‌ژوبله اوښتې

<p style="text-align: justify;">جلال‌اباد (پژواک،  ۸ زمری ۱۴۰۳): د ننګرهار ولايت مرکز جلال‌اباد ښار په مربوطاتو کې د یوې ترافيکي پېښې له امله څلور کسان مړه شوي او درې نور ټپيان دي.</p>

<p style="text-align: justify;">د ننګرهار امنيه قوماندانۍ وياند حافظ عبدالبصير زابلي د زمري په ۸مه پژواک خبري اژانس ته وويل، نن له غرمې مخکي د جلال‌اباد ښار د شپږمې امنيتي حوزې اړوند رینګ روډ سيمه کې د دوو باروړونکو ټيلر او يو باروړونکي مازدا موټرو ترمنځ ټکر شوی دی.</p>

<p style="text-align: justify;">د نوموړي په وينا په دغه پېښه کې څلور کسان مړه شوي او درې نور ټپيان شوي چې روغتيايي وضعيت یې د اندېښنې وړ ښودل شوی دی.</p>

<p style="text-align: justify;">د سيمې يوه اوسېدونکي عبيدالله پژواک ته وويل چې درې واړو موټرو د ګړندي تګ له امله ټکر وکړ او مړه او ټپيان د همدغو موټرونو چلوونکي او کلېنران دي.</p>

<p style="text-align: justify;">دا په داسې حال کې ده چې نن په هرات ولایت کې هم د یوې ترافیکي پېښې له امله د یوې کورنۍ اووه غړي مړه شوي دي.</p>