مزارشریف (پژواک، ۹ زمری ۱۴۰۳): د بلخ والي د یو شمېر ټرانسپورتي شرکتونو له مسوولینو سره په ناسته کې ویلي، له دې وروسته به امنیتي کسان د موټرو د تېز تګ مخنیوی کوي او هغه موټرچلوونکي چې تېز تګ کوي، محکمې ته معرفي کېږي.
د بلخ ولایت مقام د رسنیو او معلوماتو مرکز لخوا رسنیو ته په استول شوې خبرپاڼه کې راغلي چې د دغه ولایت والي محمدیوسف وفا تېره ورځ د ټرانسپورتي موټرونو د تنظیم کمیټې په ناسته کې ځیني پرېکړې کړي.
خبرپاڼه کې راغلي، د بلخ والي پریکړه کړې چې هېڅ ټرانسپورتي شرکت روږدی موټرچلوونکی پر دنده نه شي ګومارلی او که کوم شرکت سرغړونه وکړي محکمې ته به معرفي کېږي.
د خبرپاڼې د معلوماتو له مخې، امنیتي ځواکونه د تېز رفتاره موټر او موټرسایکل چلوونکو ته په هیڅ صورت د نقلیه وسایطو د ځغلولو اجازه نه ورکوي، که هر څوک د تېز رفتارۍ په تور ونیول شي په مستقیم ډول به محکمې ته معرفي کېږي.
په دغه ناسته کې دا پریکړه هم شوې چې کوچني زاړه او خراب موټرونه له دې وروسته نه شي کولای مسافر نورو ولایتونو ته ولېږدوي، دا خراب او زاړه موټرونه یوازي له ښاره ولسوالیو ته د مسافرو د انتقالولو حق لري.
بلخوا، د مزارشریف ښار یو شمېر ښاریان د دغې پریکړې هرکلی کوي او د ترافیکي پېښو د راکمېدو په برخه کې یې مهم بولي.
د مزارشریف ښار اوسېدونکی فرزاد اکبري وایي چې دغه ډول پرېکړې کولای شي د ټرافیکي پېښو په راکمېدو کې مثبته ونډه ولري خو ټینګار کوي چې باید عملي شي.
نوموړی دغهراز زیاتوي چې اوسمهال ډېری موټرچلوونکي د موټر چلولو جواز (لیسانس) نه لري او د دغه ډول موټرچلوونکو مخنیوی هم باید وشي.
د مزارشریف ښار یو بل اوسېدونکی احمدالله هم د دغې پریکړې هرکلی کوي او د عملي کېدو غوښتنه یې کوي.
هغه وایي: «ډېری موټرچلوونکي بېاحتیاطي کوي، موټر تېز چلوي او له همدې امله ترافیکي پېښې رامنځته کېږي او ډېری هېوادوال د دغه ډول موټرچلوونکو د بېاحتیاطۍ له امله خپل ژوند له لاسه ورکوي.»
دا په داسې حال کې ده چې ډېر کله د هېواد په یو شمېر سیمو کې د ترافیکي پېښو له امله خلک ټپیان کېږي او یا هم خپل ژوند له لاسه ورکوي.
