کابل (پژواک، ۲ وږی ۱۴۰۳): کابل کې د قطر سفارت شارژدافیر د افغانستان د کورنیو چارو وزارت له سرپرست سره په لیدنه کې ټينګار کړی چې دواړه هېوادونه به د همکاریو او اړیکو پیاوړتیا او پراختیا ته دوام ورکړي.
د کورنیو چارو وزارت پر خپله اېکسپاڼه لیکلي چې د یاد وزارت سرپرست سراجالدین حقاني تېره ورځ د قطر سفارت له نوي شارژدافير دوکتور مردف القاشوطي سره ولیدل.
حقاني افغانستان ته د قطر نوي شارژدافیر راتګ د دواړو هېوادونو لپاره ارزښتمن وباله او د دواړو هېوادونو ترمنځ تاریخي اړیکې وستایلې او د لا ډېرو همکاریو ډاډ یې ورکړ.
د قطر شارژدافیر ټينګار وکړ چې د دواړو هېوادونو ترمنځ همکاریو او د اړیکو پیاوړتیا ته به دوام ورکړي.
دا په داسې حال کې ده چې د یاد هېواد شارژدافیر وړمه ورځ د افغانستان بهرنیو چارو وزارت له سیاسي مرستیال شېرمحمد عباس ستانکزي سره په لیدنه کې ویلي وو چې هېواد یې غواړي د افغانستان د تعلیم او روغتیا سکټورنو پیاوړتیا او عامولو کې رغنده رول ترسره کړي.
