<p style="text-align: justify;">کابل (پژواک، ۲۷ وږی ۱۴۰۳): د اطلاعاتو او فرهنګ وزارت وایي، تېر کال یې مشرتابه ته د رسنیو پورونو د معاف کېدو او یا په قسط د ورکړې وړاندیز کړی، د مس عینک د تاریخو اثارو د خوندیتوب طرحه او د ژبو د ودې لپاره یې عالي شورا جوړه کړې او د خبریالانو د ملاتړ صندوق طرحه یې نهایي کړې ده.</p>
<p style="text-align: justify;">دغه راز، دغه وزارت وایي چې د رسنیو لپاره د جوازونو د انلاین وېش یې پیل کړی، د هغو کتابونو مخه یې نیولې چې «کرکه او نفاق» به یې خپاروه، د یوټیوب چینلونو او کتابونو ارزونې کمېسیون طرحې یې هم وروستۍ کړی، ۱۹۳۰۰ ځوانانو ته یې د لوړو زدهکړو له موسسو سره د هوکړو له لارې د وړیا او یا په لږ لګښت د زدهکړو زمینه برابره کړې او ۶۲۰ خبریالانو ته یې د هویت کارتونه وېشلي او له تاریخي او تفریحي سیمو د کورنیو او بهرنیو سیلانیانو د لیدنو له لارې یې ۴۷ میلیونه افغانۍ عواید ترلاسه کړي دي. سرچینه زیاتوي چې لسګونو نوو رسنیو فعالیت پیل کړی دی.</p>
<p style="text-align: justify;">د اطلاعاتو او فرهنګ وزارت نن کابل کې د حکومت د اطلاعاتو او رسنیو په مرکز کې د دولتي ادارو د یو کلنو لاستهراوړنو تشریح پروګرام په لړ کې د خپلو یو کلنو کړنو راپور وړاندې کړ.</p>
<p style="text-align: justify;">د یاد وزارت د نشراتو مرستیال مولوي حیاتالله مهاجر فراهي په نننۍ ناسته کې وویل چې دا مهال ۳۷۰ رسنۍ په هېواد کې فعالیت لري، لسګونو نوو رسنیو فعالیت پیل کړی او تر دې دمه ۶۲۰ خبریالانو ته د هویت کارتونه وېشل شوي.</p>
<p style="text-align: justify;">هغه زیاتوي: «زموږ ټوله هڅه دا ده چې په هېواد کې رسنۍ په ښه ډول فعالیت ولري، هغه رسنۍ چې اسلامي او ملي ارزښتونو، علیا منافعو او افغاني دود او دستور ته ژمنې وي، کولای شي په هېواد کې خپرونې ولري. د رسنيو د ښه تشخيص په موخه مو د رسنیو لپاره د جوازونو د انلاین وېش کار پیل کړی دی.»</p>
<p style="text-align: justify;">د فراهي په وینا، د هغو رسنیو په اړه چې لا هم پوروړي دي، د اسلامي امارت لوړ مقام ته وړاندیزونه شوي چې یا یې [د مالیاتو له مدرکه] پورونه په قسطونو تادیه شي او یا هم په کلي ډول معاف شي.</p>
<p style="text-align: justify;">ده زیاته کړه، په لومړي ځل په هېواد کې ۱۸ ډوله قرانکريمونه چاپ ته چمتو شوي چې له دې ډلې ۱۲ ډوله یې چاپ شوي او نور به ژر چاپ شي. دی وایي، په پام کې ده چې تول یو میلیون جلده قرانکریمونه چاپ شي.</p>
<p style="text-align: justify;">هغه وویل، په هېواد کې د هغو کتابونو مخه نيول شوې چې «کرکه او نفاق» به یې خپاروه، له اسلامي او ملي ارزښتونو سره په ټکر کې وو او مقدساتو ته په کې توهین کېده. ده وویل چې دا لړۍ روانه ده.</p>
<p style="text-align: justify;">فراهي وايي، د یوټيوب چینلونو، کتابونو د ارزونې کمېسیون او د خبریالانو د ملاتړ صندوق طرحې نهايي شوې او له دې وروسته به ټولو له خبریالانو سره له تبعیض پرته مرسته کېږي.</p>
<p style="text-align: justify;">د اطلاعاتو او فرهنګ وزارت مالي، اداري او ګرځندوی مرستیال مولوي قدرتالله جمال په نننۍ ناسته کې وویل چې په تېر یوه کال کې نهه زره بهرنیو ګرځندویانو د هېواد له تاریخي او تفریحي سیمو او شاوخوا نهه میلیون کورنيو سيالانیانو هم د هېواد له ګڼو سيمو ليدنه کړې او له دې اړخه ډېر عواید ترلاسه شوي دي.</p>
<p style="text-align: justify;">د دغه وزارت د معلوماتو له مخې، له تاریخي او تفریحي سیمو د کورنیو او بهرنیو سیلانیانو د لیدنو له لارې ۴۷ میلیونه افغانۍ عواید ترلاسه شوي دي.</p>
<p style="text-align: justify;">مولوي جمال زیاتوي چې سیلانیانو ته د معیاري خدماتو ترسره کولو په موخه د پکتیا په ځاځي اریوب، کاپيسا، نورستان، بامیانو او غور ولایتونو په سیاحتي سیمو کې د معیاري هوټلونو د جوړولو چارې روانې دي.</p>
<p style="text-align: justify;">د یاد وزارت د ځوانانو چارو مرستیال قاري محمدیونس راشد وویل چې تېر کال د هېواد په مرکز او ولایتونو کې د ځوانانو د وړتیاوو لوړونې په موخه، ۳۱۰ روزنیز سيمينارونه او فرهنګي غونډې جوړې شوي، نږدې ۴۴ زره کسانو د سيرت النبي، امارت پېژندنې او نورو سیالیو کې ګډون کړی او څه باندې ۲۳ زره کسان د ځوانانو چارو معینیت له ښوونیزو مرکزونو فارغ شوي دي.</p>
<p style="text-align: justify;">دی وايي، دغه معینیت د تېر یو کال په موده کې له سلو خصوصي پوهنتونو او لوړو زدهکړو له موسسو سره هوکړې کړې چې له لارې یې، ۱۵۸۱ تنو ځوانانو ته د وړیا او ۱۷۷۸۷ تنو ته په تخفیف د زدهکړو زمینه برابره شوې ده.</p>
<p style="text-align: justify;">د اطلاعاتو او فرهنګ وزارت د هنر او فرهنګ مرسیتال مولوي عتیقالله عزیزي وویل چې د رسمي ژبو ترڅنګ، د هېواد د نورو ژبو د ودې لپاره د ژبو عالي شورا جوړه شوې، څو ژبې له سقوط او ورک کېدو وژغورل شي.</p>
<p style="text-align: justify;">هغه زیاته کړه، یاد وزارت له لسګونو تاريخي سيمو ليدنه کړې، د سلګونو تاریخي اثارو د قاچاق او پلور مخه یې نیولې او د غور د جام منار وضعیت په هغه ډول نه دی چې په اړه په رسنيو کې په اړه یې خبرې کېږي.</p>
<p style="text-align: justify;">په دې وروستیو کې ځینو رسنیو ویلي چې د سېلابونو له امله د جام منار د نړېدو په اړه اندېښنې زياتې شوې دي.</p>
<p style="text-align: justify;">عزیزي وایي، لوګر کې د مس عینک کان لپاره - چې د چین هېواد اېمسيسي کمپنۍ ته ورکړل شوی - داسې طرحه جوړه شوې چې هم د مسو استخراج ته لار برابره شوې او هم به یې تاریخي اثار خوندي وي.</p>
