د مرکزي اسیا والیبال سیالۍ؛ افغانستان نن له ترکمنستان سره د درېیم مقام لپاره لوبه کوي

کابل (پژواک، ۳ لړم ۱۴۰۳): د افغانستان د والیبال ملي لوبډله د مرکزي اسیا سیالیو په لړ کې نن د درېیم مقام ګټلو لپاره له ترکمنستان سره لوبه کوي.

د مرکزي اسیا د والیبال ټولنې نن پر خپله فېسبوک‌پاڼه د لوبو یو جدول خپور کړی چې په کې د افغانستان د والیبال ملي لوبډله له ترکمنستان سره د برنزو مډال «درېیم مقام» ترلاسه کولو لپاره لوبه کوي.

دغه سیالي نن له غرمې وروسته د افغانستان پر وخت یوه نیمه بجه د ازبکستان په پلازمېنه تاشکند کې ترسره کېږي.

دغه راز، افغانستان د مرکزي اسیا والیبال سیالیو په لړ کې له دې مخکې پنځه لوبې ترسره کړې چې یوازې مالدیف ته یې ماته ورکړې خو ترکمنستان، ازبکستان، تاجکستان او قرغیزستان ته یې بیا لوبې بایللې دي.