مزارشریف (پژواک، ۵ لړم ۱۴۰۳): د بلخ په مرکز مزارشریف کې د یوه خصوصي ښوونځي زدهکوونکو په لاس د جوړ شوو ساینسي او رباتیکي توکو یو ورځنی نندارتون جوړ شو.
دغه نندارتون چې د مزارشریف ښار افغان – ترک لېسه کې جوړ شوی و، زدهکوونکو په کې په خپل لاس جوړ کړي ساینسي او رباتیک توکي نندارې ته وړاندې کړل.
د دغه نندارتون جوړولو مسوول عبدالجلیل ذکي پژواک خبري اژانس ته وویل چې په دغه یو ورځني نندارتون کې د زدهکوونکو له خوا څه باندې ۱۰۰ ساینسي او رباتیکي پروژې نندارې ته وړاندې شوې دي.
هغه زیاتوي چې دغه نندارتون د زدهکوونکو نظري او تیوريکي زدهکړو ته د عملي بڼې ورکولو په موخه جوړ شوی دی.
بلخوا، زدهکوونکي د دغه نندارتون د جوړېدو هرکلی کوي او وایي که حکومت یې ملاتړ وکړي خپلې پروژې به عملي کړي.
د مزارشریف افغان – ترک معارف لېسې د لسم ټولګي زدهکوونکی رحمتالله قادري چې په خپل لاس یې جوړ کړی سټلایټ نندارې ته وړاندې کړی وایي، دغه سټلایټ د کامرې په درلودو سره کولای شي د هوا تودوخي او رطوبت درجه معلومه کړي.
قادري زیاتوي که حکومت د زدهکوونکو ملاتړ وکړي او په دې برخه کې پانګونه وشي کولای شي دغه ابتدایي پروژې په لوړه کچه عملي کړي.
راتب صابرزاده د دغه نندارتون یو بل ګډونوال وایي، دغه نندارتون له زدهکوونکو سره مرسته کوي څو د ورته نورو توکو جوړولو لپاره هم وهڅېږي.
ورته مهال، د بلخ پوهنې ریاست مسوولین د دغه نندارتون ګډونوالو ته د ملاتړ ډاډ ورکوي.
د بلخ پوهنې ریاست د ښاري پوهنې امر محمدنعیم بلخي وایي چې دغه ریاست هڅه کوي څو د یادو زدهکوونکو پروژې نورو مسوولینو ته وروپېژني او د عملي کېدو لپاره ورسره مرسته وکړي.
د یادونې ده، تېر کال هم د دغه ولایت په کچه د دولتي او خصوصي ښوونځیو زدهکوونکو له لوري د جوړ شوو توکو نندارتون جوړ شوی و.
GET IN TOUCH
NEWSLETTER
SUGGEST A STORY
PAJHWOK MOBILE APP