د ډیپلوماټیکو اړیکو محدودلو په اړه د ناروې پرېکړه؛ افغانستان یې په اړه ناخوښي څرګنده کړې

<p style="text-align: justify;">کابل (پژواک، ۱۷ لېندۍ ۱۴۰۳): د افغانستان بهرنیو چارو وزارت د ناروې د هغې پرېکړې له امله ناخوښي څرګنده کړې چې ویلي یې دي، له افغانستان سره د ډيپلوماټیکو اړېکو کچه ټیټوي.</p>

<p style="text-align: justify;">د راپورونو له مخې، تېره ورځ د ناروې بهرنیو چارو وزارت ویلي وو، له افغانستان سره اړیکې محدودوي او د اسلامي امارت نوی سفیر نه مني؛ دغه راز ناروې د هېوادونو ترمنځ د اړیکو لپاره نړۍوال قوانین بنسټ بولي او د دغو قوانینو له مخې کولای شي د اسلامي امارت سفیر رد کړي.</p>

<p style="text-align: justify;">د افغانستان بهرنیو چارو وزارت خبرپاڼه کې راغلي چې د ناروې شاهي دولت د هغې پرېکړې له امله ناخوښي څرګندوي چې له مخې يې د ديپلوماتيکو اړيکو کچه راټيټه کړې ده.</p>

<p style="text-align: justify;">سرچېنې لیکلي: «هيله لرو چې دا ډول پريکړې بايد د هيوادونو په داخلي چارو پورې ونه تړل شي.»</p>

<p style="text-align: justify;">خبرپاڼه کې راغلي، د يپلوماتيکه ښکيلتيا هلته مؤثره وي چې د لوريو ترمنځ متقابل تفاهم او احترام ته وده ورکړي، که څه هم په ليدلوريو کې اختلافات شتون ولري.</p>

<p style="text-align: justify;">یاد وزارت لیکلي، قونسلي خدماتو ته لاسرسی د هر وګړي بنسټيز حق دی، او اسلامي امارت ټول لوري جدي هڅوي چې دې اصل ته د نړيوالو همکاريو په روحیه لومړيتوب ورکړي.</p>

<p style="text-align: justify;"></p>