د افغانستان کرکټ ملي لوبډله نن له زمبابوې سره دویمه شل‌اوریزه لوبه کوي

کابل (پژواک، ۲۳ لیندۍ ۱۴۰۳): د افغانستان د کرکټ ملي لوبډله به نن د زمبابوې له لوبډلې سره د شل‌اوریزې لوبلړۍ دویمه لوبه ترسره کړي.

دغه لوبه د افغانستان پر وخت ماذیګر څلور بجې د زمبابوې په حرارې ښار کې ترسره کېږي.

افغان لوبډلې د دې لوب‌لړۍ په لومړۍ لوبه کې له زمبابوې لوبډلې څخه د څلورو ویکټو په توپير ماتې وخوړه.

د افغانستان د کرکټ بورډ د معلوماتو له مخې، د دې لوب‌لړۍ درېیمه لوبه به د روانې ډسمبر میاشتې په ۱۵ نېټه ترسره شي.

افغان لوبډله له زمبابوې سره د درېیو یو ورځنیو او دوو ټیسټ لوبو لړۍ هم لري چې په ترتیب سره به تر جنوري میاشتې پای ته ورسېږي.