<p style="text-align: justify;">غزنيښار (پژواک، د مرغومي لومړۍ نېټه ۱۴۰۳): د غزني ولایت د ګيلان ولسوالۍ قومي مشرانو، دیني عالمانو او حکومتي مسوولینو د ناسمو رواجونو د مخنیوي په موخه یو ۱۳ مادهییز پرېکړهلیک صادر کړ.</p>
<p style="text-align: justify;">جبري ودونه، له قانوني عمر مخکې د ودونو، کونډو ته اختیار نه ورکولو، لوړ ولور، د ودونو د ډېرو لګښتونو، ودونو کې د قلنګ په نوم د مختلفو توکو د ورکولو، ښځو ته د میراث حق نه ورکولو، په بدو کې د نجونو ورکولو او د ځینو نورو مواردو د مخنیوي په اړه دغه پرېکړهلیک صادر کړی دی.</p>
<p style="text-align: justify;">د ګیلان یوه قومي مشر حاجي حیات پژواک خبري اژانس ته وویل چې د دې ولسوالۍ په جنډې سیمه کې قومي مشران، دیني عالمان او حکومتي مسوولین راټول شوي وو او د بدو رواجونو د مخنیوي پرېکړه یې وکړه.</p>
<p style="text-align: justify;">هغه وايي چې د دې پرېکړې له مخې د نجلۍ ولور درې سوه زره افغانۍ او د کونډې ۱۵۰ زره افغانۍ ټاکل شوی دی.</p>
<p style="text-align: justify;">دی وايي، دلته مخکې ولور تر یو میلیون افغانۍ پورې و چې له امله یې ځوانان اړ کېدل نورو هېوادونو ته مسافر شي څو د ولور پيسې پوره کړي.</p>
<p style="text-align: justify;">دغه راز یو بل قومي مشر محمدشکور پژواک ته وویل چې د دې ولسوالۍ ترهکي، شبيخېل، عليخېل، میرهکي او د اندړو قومونو د بدو رواجونو د مخنیوي پرېکړه وکړه چې ټولې ولسوالۍ ته د منلو وړ ده.</p>
<p style="text-align: justify;">هغه وايي چې د بدو رواجونو د مخنیوي په موخه دوی ۱۳ مادهییز پرېکړهلیک صادر کړی او که څوک ترې سرغړونه وکړي نو سزا ورکول کېږي.</p>
<p style="text-align: justify;">دغه راز، د ګيلان ولسوالۍ یوه ځوان محمدوصیل پژواک ته وویل، ځوانانو ته ډېره سخته وه چې په ورځمزدورۍ ولور پوره کړي.</p>
<p style="text-align: justify;">دی وايي: «دلته د ورځې ۳۰۰ افغانۍ مزدوري ده، نو موږ به یو میلیون ولور څنګه پوره کاوه، اوس ښه شو درې لکه روپۍ شو.»</p>
<p style="text-align: justify;">دغه راز، د ګيلان یوه دیني عالم مولوي اغامحمد وویل، دیني عالمان د هغو غونډو او پرېکړو ملاتړ کوي چې د خلکو ګټه په کې موجوده وي او ټولنیزې ستونزې ورسره حلېږي.</p>
<p style="text-align: justify;">همدارنګه د ګيلان ولسوال مولوي غلام رسول انس هم د یادې پرېکړې ملاتړ وکړ او ویې ویل چې په تطبیق کې یې له قومي مشرانو سره همکاري کوي.</p>
<p style="text-align: justify;">د يادونې ده، له دې مخکې هم د غزني په اندړو، ګيرو، قرهباغ او واغظ ولسوالیو کې د قومي مشرانو له لوري ورته پرېکړې شوې چې په ډېرو سیمو کې عملي شوې هم دي.</p>
