میدانښار (پژواک، ۸ مرغومی ۱۴۰۳): د میدانوردګو ولایت په مربوطاتو کې په دوو جلا ترافیکي پېښو کې پنځه کسان مړه او نهه نور ټپیان شوي دي.
د میدانوردګو امنیې قوماندانۍ ویاند محمدیوسف اسرار پژواک خبري اژانس ته وویل چې نن د نرخ ولسوالۍ اړوند د اندړو په سیمه کې یوه مازدا او سراچه موټرو ټکر کړی دی.
هغه زیاته کړه چې په دې پېښه کې درې کسان مړه او درې نور ټپیان شوي دي.
نوموړی دغه راز وايي چې د سیداباد ولسوالۍ اړوند په ټوپ دښته کې یو فورنر موټر د ګړندي تګ له امله چپه شوی دی.
دی وایي چې په دې پېښه کې دوه ماشومان مړه او د ښځو او ماشومانو په ګډون شپږ نور کسان ټپیان شوي دي.
اسرار وویل چې د یادو پېښو ټپیان او جسدونه د امنيتي ځواکونو او خلکو په همکارۍ روغتيايي مرکزونو ته انتقال شوي دي.
نوموړی د دواړو پېښو لامل د موټرچلوونکو بېاحتیاطي په ګوته کړه.
