کابل (پژواک، ۲۹ مرغومې ۱۴۰۳): د بهرنیو چارو وزارت سیاسي مرستیال، خوست کې د یوې مدرسې په فراغت غونډه کې د ا.ا له مشرانو د نجونو پر مخ د علم دروازو د پرانستې غوښتنه وکړه.
محمد عباس ستانکزی وایي: "زموږ د امارت له مشرانو څخه دا تقاضا ده چې د علم دروازې باید خلاصې وي، دې ته هېڅ بهانه نه شته، نه به وي او نه به یې کوي."
دی زیاتوي چې د رسول الله (ص) په وخت کې د علم دروازې د نر او ښځې پر مخ خلاصې وې او نیم علم د بي بي عایشې (رض) څخه را انتقال شوی دی.
هغه وايي: «نن موږ په څلوېښت میلیون نفوس کې له شل میلیونه سره بې عدالتي کوو، ایا موږ به د قیامت په ورځ دغسې راپورته نه شو چې ټول به فلج یو، میراث نشته، د مېړه د تعیین حق نشته، په بدو کې یې ورکوو، تعلیم ته یې نه پرېږدو، مسجد ته یې نه پریږدو، د پوهنتون دروازې پرې بندې دي، مدارسو ته یې هم نه پریږد،
ایا موږ په شریعت باندې یو، نن ټوله نړۍ موږ سره په همدغه مشکل اخته ده او همدغه انتقاد کوي پر موږ باندې، موږ چې په کومه لاره روان یو، دا د طبیعت خبره ده نه د شریعت.»
دا په داسې حال کې ده چې د اسلامي امارت مشرتابه د ښځو د میراثدحق، جبري ودونو او په بدو کې ورکولو د مخنیوي فرمان ورکړی او د اسلامي امارت چا واکو ویلي چې د شرایطو په برابرېدو سره به د نجونو له شپږم ټولګي پورته ښوونځیو او پوهنتونونو دروازې هم پرانستل شي.
GET IN TOUCH
NEWSLETTER
SUGGEST A STORY
PAJHWOK MOBILE APP