اسعداباد (پژواک، ۱۵ سلواغه ۱۴۰۳): د کونړ امنیتي مسوولین وایي چې د دغه ولایت په چپې درې ولسوالۍ کې یې د ۱۵۰ جوړو چهارتراش لرګیو د قاچاق مخه نیولې ده.
د کونړ امنیه قوماندان مولوي ضیاءالحق حامد پژواک خبري اژانس ته وویل چې تېره شپه د ځنګلونو د ساتنې قطعې د ځانګړو عملیاتو پر مهال په چپې درې ولسوالي کې ۱۵۰ جوړې چهارتراش لرګي چې په ناقانونه توګه په قاچاقي لارو لېږدول کېدل، نیولي دي.
هغه وویل: «د ځنګلونو د ساتنې بیدارې قطعې په خپلو هڅو د چپې درې اړوند سیمه کې د نښترو وهل شوي لرګي چې چهارتراش سلیفر ترې جوړ شوي وو او په پټه او ناقانونه لارو د خرڅلاو په موخه نورو سیمو ته لېږدول کېدل ونیول شول.»
د نوموړي په خبره، د یادو لرګیو قاچاقکوونکي په تېښته بریالي شوي چې د نیولو هڅې یې روانې دي.
هغه دغه راز وویل، تېرو څه باندې درېیو کلونو کې یې د لرګیو د قاچاق په تور ۳۹۰ کسان نیولي او عدلي او قضایي ارګانونو ته یې ورپېژندلي دي.
GET IN TOUCH
NEWSLETTER
SUGGEST A STORY
PAJHWOK MOBILE APP