پلخمري (پژواک، ٢٣ سلواغه ١٤٠٣): بغلان کې نن «په ټولنیز پرمختګ کې د خلکو او حکومت ترمنځ خبرې اترې» په نوم یوه ولسي غونډه وشوه چې ګډونوالو یې د ټولنیز عدالت د ټینګښت په موخه له اداري فساد سره د مبارزې او د قومونو ترمنځ د یووالي رامنځته کېدو غوښتنه وکړه.
په دې غونډه کې یو ه قومي مشر حاجي محمدیعقوب ستانکزي وویل، په دولتي ادارو کې لا هم فساد شتون لري چې ریښې یې له مخکني نظام څخه پاتې دي.
هغه وویل، افغانانو له تېرو پنځوسو کالونو راهیسې پرېمانه بېعدالتۍ لیدلي خو له اسلامي امارت یې غوښتنه وکړه چې په ټولنه او حکومت کې د هر ډول فساد او بېعدالتیو رېښې وباسي.
دغهراز له نهرین ولسوالي څخه راغلي قومي مشر دینمحمد فروغ وویل، د پیاوړې حکومتولۍ رامنځتهکېدو لپاره باید حکومت او ولس په یوه نظر اوسي او زیاته یې کړه چې دا د حکومت مسوولیت دی څو د ولسونو د نظر اورېدو ته زمینه برابره کړي.
هغه وویل: «بدبختانه لا هم په قومونو او سمت ویشل شوي یو، دغه د سمت او قوم شته واټن د له منځه وړلو لپاره یواځنۍ لاره د ټولنیز عدالت رامنځته کول دي چې په افغانستان کې د ټولو قومونو ترمنځ د یووالي لامل ګرځي.»
ورته مهال د بغلان والي مولوي عبدالرحمن حقاني هم په خپلو خبرو کې ژمنه وکړه چې له فساد سره به جدي مبارزه کوي.
هغه وویل: تر ډېره د اداری فساد مخنیوی شوی، د خلکو د غوښتنو مطابق د یو شمېر انکشافي پروژو منظوري هم راغلې، که بیا هم په ځینو ادارو کې فساد وي، ژمنه کوم چې په وړاندې به یې سخته مبارزه وکړم، خو له خلکو هم له نظامه د ملاتړ او لا ډېرې همکارۍ غوښتنه کوم.»
د مسوولینو په خبره، د نظام پایښت او ټولنیز پرمختګ د ولسونو په یووالي کې نغښتی او حاکم نظام یې پر پلي کولو مکلف دی.
