د اروزګان ګېزاب کې د ځمکې د ملکیت پر سر د دوو قومونو ترمنځ ۳۶ کلنه ستونزه حل شوه

ترینکوټ (پژواک، ۲۹ سلواغه ۱۴۰۳): د اروزګان په ګېزاب ولسوالۍ کې د یوې منځګړې شورا له لوري د دوو قومونو ترمنځ د شاوخوا ۴۰۰ جریبه ځمکې د ملکیت په سر ۳۶ کلنه ستونزه حل شوه.

د اروزګان ولایت د ګېزاب ولسوالۍ اړوند په کنځیري سیمه کې د شاوخوا څلور سوه جریبه ځمکې د ملکیت په سر ۳۶ کلنه ستونزه چې دواړو لوریو دوه – دوه ځلې یو او بل ورڅخه ګډه کولو ته اړ کړي وو، حل او فصل شوه.

د ګېزاب ولسوال ملا میرحمزه حنفي پژواک خبري اژانس ته وویل، د تېرې پنجشنبې په ورځ د یوې منځګړې شورا پرېکړې ته دواړو خواو غاړه کېښوده چې په پایله کې یاده ستونزو د ځمکې په پلور سره پای ته ورسېده.

نوموړي زیاته کړه، دغه منځګړې شورا چې شپږ کسان د پښتنو او شپږ نور د هرازه اوسېدونکو له خوا ورته ټاکل شوې وو، پرېکړه وکړه چې د کنځیري سیمې شاوخوا څلور سوه جریب ځمکې ته به نرخ ټاکل کېږي.

ولسوال وویل، په یاده دولس‌کسیزه شورا کې شپږ تنه له یوه او شپږ تنه له بل لوري ټاکل شوي وو چې یادې شاوخوا ۴۰۰ جریب ځمکې ته یې ۳۰ میلیونه افغانۍ نرخ وټاکه او پرېکړه وشوه چې که هر لوری د ځمکې د اخیستلو توان لري، بل لوري ته به یې پیسې ورکوي.

نوموړي زیاته کړه: «جنجال د پښتنو او هزاره‌‌وو ترمنځ وو، بلاخره یې د شورا پرېکړه ومنله او هزاره‌وو د ځمکې د اخیستو پرېکړه وکړه، ټاکل شوې پیسې به په درېیو قستونو کې ورکول کېږي او په بدل کې به یې د سیمې پښتانه د یادې ځمکې د ملکیت خط هزاره اوسېدونکو ته ورکوي.»

د هغه په خبره، له دې پرېکړه سره د دواړو لوریو ترمنځ ۳۶ کلنه ستونزه پای ته ورسېده او زیاتوي چې یاده موده کې دواړو لوریو څو – څو ځله پر یوه او بل بریده هم کړي او د سیمې پرېښودو ته یې اړ کړي وو.

ورته مهال، د یادې سیمې پښتانه او هزاره‌ اوسېدونکي خوشحاله دي چې اوږده ستونزه یې حل شوه او له دې وروسته به له یو او بل سره په ارامه فضا کې ژوند کوي.

د سیمې یو تن اوسېدونکي ملا عبیدالله وویل، خوښ دي چې نږدې ۴۰ کلنه ستونزه یې حل شوه.

هغه وویل: «خوشحاله یم چې له لسیزو وروسته تېره ورځ منځګړو دې اوږدې شخړې ته حل لاره پیدا کړه.»

دغه راز د یادې سیمې یوه بل اوسېدونکي عبدالرشید وویل چې دوی هم خوشحاله دي چې ستونزه یې د منځګړو له لوري هواره شوه.

نوموړي وویل: «دا پیسې زمونږ له توانه وتلې خبره ده، خو په دې خوشحاله یو چې له لسیزو وروسته مو شخړه حل شوه.»

د یادونې ده، له دې مخکې هم د اروزګان ولایت په بېلابېلو سیمو کې د ځمکو د ملکیت یا نورو ستونزو پر سر رامنځته شوې شخړې او دښمنۍ د ځايي مسوولینو، قومي مشرانو او دیني عالمانو له لوري حل شوې دي.