<p style="text-align: justify;">کابل (پژواک، ۵ کب ۱۴۰۳): د کرنې، اوبو لګولو او مالدارۍ وزارت مسوولین وایي، افغانستان د چرګ غوښې په تولید کې ځان بسیاینې ته رسېدلی او د غنمو د تولید برخه کې خودکفایي ته نږدې شوی دی.</p>
<p style="text-align: justify;">د کرنې، اوبو لګولو او مالدارۍ وزارت له لوري په کابل کې د نیالګیو د ملي کمپاین د پيل په تړاو جوړه شوې غونډه کې د دغه وزارت د اوبو لګولو او طبیعي سرچینو مرستیال مولوي بازمحمد فیضان وویل، افغانستان په ځینو زراعتي برخو کې خودکفایي ته رسېدلی دی.</p>
<p style="text-align: justify;">هغه زیاته کړه، افغانستان د غنمو د تولید په برخه کې ځان بسیاینې ته نږدې شوی دی او هڅې روانې دي چې په نورو برخه کې هم خودکفایي ترلاسه کړي.</p>
<p style="text-align: justify;">د کرنې وزارت د اوبو لګولو او طبیعي سرچینو مرستیال په دې اړه نورجزییات وړاندې نکړل.</p>
<p style="text-align: justify;">همدارنګه په دې غونډه کې د کرنې، اوبو لګولو مالدارۍ وزارت د زراعت او مالدارۍ مرستیال مولوي صدراعظم عثماني وویل: «موږ د چرګ غوښې د تولید په برخه کې خودکفایي ته رسېدلي یو.»</p>
<p style="text-align: justify;">هغه پرته له جزییاتو زیاته کړه چې افغانستان په نورو برخو کې هم ځان بسیاینې ته نږدې شوی دی.</p>
<p style="text-align: justify;">نوموړی وایي، په تېرو درېیو کلونو کې په ټول هېواد کې د اوبو مدیریت، د نیالګیو کېنولو او مالدارۍ برخو کې ډېر کار شوی دی.</p>
<p style="text-align: justify;">ورته مهال، په یاده غونډه کې د کرنې او مالدارۍ خونې رییس خانمحمد فروتن له خلکو غوښته وکړه چې له داخلي تولیداتو دې استفاده وکړي، څو افغانستان په ټولو برخو کې خودکفایي ته ورسېږي.</p>
<p style="text-align: justify;">دا په داسې حال کې ده چې د روان ۱۴۰۳ کال په لړم میاشت کې د احصایې او معلوماتو ملي ادارې ویلي وو چې روان لمریز کال په ټول هېواد کې څلور اعشاریه ۸۳ میلیون مټریک ټنه غنم تولید شوي چې د تېر کال په پرتله ۱۰ سلنه ډېروالی ښيي.</p>
