کابل (پژواک،۶ کب ۱۴۰۳): د کار او ټولنیزو چارو وزارت وايي چې دا مهال د هېواد په کچه د دغه وزارت اړوند ۵۰ روزنتونونو کې څه باندې ۷ زره یتیم او بېسرپرسته ماشومان ساتل کېږي.
د افغانستان د کار او ټولنیزو چارو وزارت ویاند سمیعالله ابراهیمي پژواک خبري اژانس ته وویل چې د هېواد په کچه ۵۰ روزنتونونه د دغه وزارت په چوکاټ کې فعالیت کوي چې له ډلې یې لس روزنتونونه د نجونو او پاتې نور یې د هلکانو لپاره ځانګړي شوي دي.
هغه زیاته کړه چې په دغو روزنتونونو کې څه باید اووه زره یتیم او بېسرپرسته ماشومان په یوه خوندي چاپېریال کې ساتل کېږي.
هغه څرګنده کړه، په یادو روزنتونونو کې یتیم ماشومانو ته د اوسېد ځای، خوراک او پوښاک امکاناتو برابرېدو ترڅنګ، هلکانو ته د نارینه ښوونکو او نجونو ته د ښځینه ښوونکو له لوري تخنیکي او مسلکي زدهکړې هم ورکول کېږي.
کابل کې د یتمو نجونو د یوه روزنتون کارکوونکې چې نه غواړي په راپور یې نوم یاد شي پژواک ته وویل: «واقعاً چې دغو یتیمو ماشومانو ته خوندي چاپېریال برابر شوی، نجونې په ټولو دورو کې په عزت او حرمت سره ساتل کېږي، ښه خواړه او ښه پوښاک ورته برابریږي، یعنې ټولې اړتیاوې یې پوره کېږي.»
هغې زیاته کړه چې د دغه روزنتونونو ټول ښوونکي او کارکوونکي ښځینه دي.
په همدې حال کې، د کار او ټولینزو چارو وزارت مطبوعاتي دفتر نن (دوشنبه) د یوې اعلامیې په خپرولو ویلي چې د نورو یتیمو او بېسرپرسته ماشومانو د جذب لپاره د دغه وزارت د مسوولینو او بګرامي ولسوالۍ د علماوو او قومي مشرانو د همغږۍ ناسته وشوه.
په اعلامیه کې راغلي چې د دغه وزارت د روزنتونونو رییس مولوي محمداصغر صفدري د یتیم ماشومانو د کفالت د اهمیت او د هغوی ذهني ودې ته د پاملرنې په اړه خبرې وکړې.
هغه وایي، له دې امله چې هېواد کې د یتیمو او بېسرپرسته ماشومانو شمېر ډېر زیات دی او دوی امکاناتو ته په کتو په پام کې لري څو مستحق ماشومان روزنتونونو ته جذب کړي.
هغه زیاته کړه چې دغه موخې ته د رسېدو لپاره د ځايي مسوولینو، دیني عالمانو، شوراګانو او قومي مشرانو مرستې ته اړتیا ده.
په خبرپاڼه کې راغلي چې د یادې ناستې ځینو ګډونوالو د یتیم او بېسرپرسته ماشومانو د کفالت په برخه کې د دغه وزارت له اقداماتو هرکلی وکړ او ژمنه یې وکړه چې له دغه وزارت سره هر اړخیزه همکاري کوي.
