نورستان کې د واورې ښویېدو پېښه کې څلورو کسانو ته مرګ‌ژوبله اوښتې

اسعداباد (پژواک، ۱۹ وری ۱۴۰۴): ځايي مسوولین وايي، تېره ورځ د نورستان د مرکز پارون په پرونز غرنۍ سیمه کې د واورې ښویېدنې له امله یو ځوان مړ شوی او درې تنه نور ژوبل شوي دي.

د نورستان ولایت د والي ویاند فریدون صمیم پژواک خبري اژانس ته وویل، تېره ورځ له غرمې وروسته د مرکز پارون په پرونز غرنۍ سیمه کې پر هغو ځوانانو واوره را ښوېدلې چې د «خېزې» په نوم سبو پسې یادې سیمې ته ختلي وو.

د نوموړي په خبره، دې پېښه کې یوه تنکي ځوان ژوند له لاسه ورکړی او درې نور ژوبل شوي دي.

هغه وویل: «د پېښې د قربانیانو عمرونه د ۱۴ او ۱۶ کلونو ترمنځ دي چې له ډلې یې ۱۶ کلن تنکی ځوان، قاري سعید شهید شوی او درې تنه نور ټپیان شوي دي.»

نوموړي زیاته کړه، د پېښې ځای ته مسوولین رسېدلي او ژوبل شوي کسان یې هم روغتون ته انتقال کړي چې روغتیايي وضعیت یې د ډاډ وړ دی.