مهترلام (پژواک، ۹ غویی ۱۴۰۴): د لغمان د بادپښ یو شمېر اوسېدونکي وايي، د دې ولسوالۍ ځینو کلیو ته د برېښنا رسولو پروژه چې چارې یې د تېر حکومت پر مهال ۹۵ سلنه ترسره شوې، بشپړه شي.
د لغمان د بادپښ ولسوالۍ د اندروړ سیمې اوسېدونکي او قومي مشر ملک فیضمحمد پژواک خبري اژانس ته وویل، د مخکني حکومت پر مهال د دې ولسوالۍ یو شمېر کلیو ته د برېښنا رسولو یوې پروژې چارې ۹۵ سلنه ترسره شوې خو د ځینو دلایلو له مخې ولاړې دي چې باید بشپړې شي.
هغه زیاته کړه، په اندروړ سیمه کې د ۱۴ کلیو لپاره څلور ترانسفرمرونه لګېدلي، پایې درول شوې او لینونه هم پهکې غځېدلي خو دا چې برېښنا نه لري، ګټه نه شي ترې اخیستلی او ورځ په ورځ د ویجاړېدو په حال کې دي.
دغه راز، د شاهګلیانو سیمې اوسېدونکي ملک خیالمحمد وویل، د دوی په سیمه کې شاوخوا ۴۰ پایې نصب شوې، د لینونو غځول او تخنیکي کارونه یې هم ترسره شوي، خو په خبره یې چې تر اوسه ورته برېښنا نه ده وصل شوې.
د هغه په خبره: «نور ټول کارونه یې خلاص دي، حکومت دې موږ ته صرف د مېترونو وېش پیل کړي.»
همدارنګه د ګړوچ سیمې اوسېدونکي عبدالله وویل، دوی یوازې د برېښنا وصلېدو او د مېترونو د وېش امر ته منتظر دي؛ ځکه په سیمه کې یې د برېښنا شبکې ټولې چارې پای ته رسېدلې دي.
ورته مهال، د لغمان د برېښنا ریاست مسوولین د بادپښ ولسوالۍ د برېښنا شبکې د چارو ځنډېدو ستونزه مني خو هیله ښيي چې د روان کال په اوږدو کې به یې پاتې چارې بشپړې او یادې ولسوالۍ ته به برېښنا وصل کړي.
د لغمان د برېښنا رییس مولوي عمرګل نایب پژواک خبري اژانس ته وویل، په ۱۳۹۸ لمریز کال کې د افغانستان د برېښنا شرکت له لوري په بادپښ کې د سل میلیون افغانیو په لګښت د برېښنا شبکې د جوړېدو چارې پای ته رسېدلې چې ۲۲ ترانسفرمرونه پهکې نصب او ۶۰ کیلومتره مزي یې هم غځول شوي دي.
د هغه په خبره، یوازې د کابل ولایت د سروبي ولسوالۍ اړوند په اوزبین سیمه کې د کابل برېښنا ریاست له خوا کارونه په ټپه ولاړ دي.
نوموړي وویل، که د کابل برېښنا شرکت په یاده سیمه کې د برېښنا اړوند پاتې کارونه بشپړ کړي، دوی چمتو دي چې پّ بادپښ کې د برېښنا د وېش عملي چارې پیل کړي.
نوموړي په مشخص ډول ونه ویل چې هلته یې کارونه ولې او په کومه کچه له ځنډ سره مخ شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP