غزني ښار (پژواک، ۱۵ غویی ۱۴۰۴): د غزني د امنیې قوماندانۍ مسوولین وايي، د جاغوري ولسوالۍ امنیتي ځواکونو د هغه کس جسد پیدا کړی چې یوه اونۍ مخکې نادرکه شوی و.
د غزني ولایت د امنیې قوماندانۍ ویاند ابو خالد سرحدي پژواک خبری اژانس ته وویل، یاد کس د اروزګان ولايت د خاص اروزګان ولسوالۍ اصلي اوسېدونکی و چې په جاغوري ولسوالۍ کې یې پسونه څرول او په خبره یې چې له تېرې یوې اونۍ راهیسې نادرکه شوی و.
نوموړي وویل، امنیتي ځواکونو لومړی هلته د هغه څاروي موندلي وو او بیا یې د هغه په تړاو پلټنې پیل کړې وې چې نن یې د ولاړو اوبو په یوه ډنډ کې د هغه جسد موندلی دی.
د سرحدي په خبره، تراوسه د نوموړي د وژنې انګېزه نه ده معلومه او نه هم تراوسه په دې تړاو څوک نیول شوي دي.
