پلعلم (پژواک، ۲۴ غويی ۱۴۰۴): د ملګرو ملتونو د ماشومانو ملاتړ صندوق (UNICEF) د لوګر ولایت له دولتي ښوونځیو سره د ۷۰ زره امریکایي ډالرو په ارزښت د درسي توکو مرسته وکړه.
د لوګر د پوهنې ریاست ویاند شاهپورعرب پژواک خبري اژانس ته وویل، په یادو درسي توکو کې کتابونه، د زدهکوونکو او ښوونکو لپاره قرطاسیه، خېمې او نور اړین وسایل شامل دي.
عرب زیاته کړه چې دغه درسي توکي به د پوهنې ریاست د یوه ګډ پلاوي له لوري په مرکز پلعلم او ولسوالیو کې د دولتي ښوونځيو پر ۵۰ زره زدهکوونکو او ښوونکو ووېشل شي.
نوموړي دغه راز وویل، د روان ښوونیز کال په پيل کې پوهنې وزارت هم سلګونه زره ټوکه د ښوونځيو کتابونه پر زدهکوونکو وېشلي او تر ډېره په ښوونځیو کې د کتابونو د کمښت ستونزه د پخوا په پرتله کمه شوې ده.
د مرکز پلعلم یوه ښوونکي صدیقالله پژواک ته وویل، خوښ دی چې د ملګرو ملتونو د ماشومانو ملاتړ صندوق (UNICEF) له لوري له ښوونځيو سره د درسي توکو مرسته وشوه.
هغه زیاته کړه، اوس هم په مرکز پلعلم او ولسوالیو کې د ښوونځيو زدهکوونکي د کتابونو له کمښت سره مخ دي او باید پوهنې وزارت او نړۍوال بنسټونه دې ستونزې رسېدنه وکړي.
هېره دې نه وي، له دې مخکې هم د لوګر له ښوونځیو سره د ملګرو ملتونو د ماشومانو ملاتړ صندوق (UNICEF) له لوري د شاوخوا ۴۵ زره امریکایي ډالرو په ارزښت د درسي توکو مرسته شوې ده.
