خوستښار (پژواک، ۲۹ غويی ۱۴۰۴): خوست کې سیمهييز مسوولین وايي چې د دغه ولايت په ګمرک کې له پاکستانه راوړل شوي سلګونه کیلوګرامه چاودېدونکي توکي نیول شوي دي.
د خوست د والي ویاند مستغفر ګربز پژواک خبري اژانس ته وويل، دغه چاودېدونکي توکي چې له پاکستانه راوړل شوي وو، تېره ورځ په غلامخان بندر کې د ګمرک مسوولينو نيولي دي.
ګربز زیاته کړه چې په دغو چاودېدونکو توکو کې چې په يو باروړونکي موټر کې ځای پر ځای شوي وو، ۲۷۰ کيلوګرامه باروت، سل کڅوړې ثانيهسوز، ۳۶ قطي پټاکۍ او نور چاودېدونکي توکي شامل دي.
هغه زياته کړه چې دغه چاودېدونکي توکي په ډېر ماهرانه ډول د ګلګل په بېلرونو کې ځای پر ځای شوي وو.
د نوموړي په وينا، د يادو توکو په تور نيول شوي کسان تر څېړنو لاندې دي، خو ویې نه ویل چې څو کسان نیول شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP