میدان‌وردګو کې د ناوړه دودونو مخنیوي په موخه ولسي غونډه جوړه شوه

<p style="text-align: justify;">میدان‌ښار (پژواک، ۱۸ چنګاښ ۱۴۰۴):  په میدان‌وردګو ولایت کې د ناوړه دودونو مخنیوي په موخه ولسي غونډه جوړه شو او ګډونوالو یې ټینګار وکړ چې ناسم دودونه باید د حکومت او ولس په ګډو هڅو له منځه یووړل شي.</p>

<p style="text-align: justify;">دغه غونډه د میدان‌وردګو ولایت په مرکز میدان‌ښار کې جوړه شوې وه چې په‌کې سیمه‌ییزو حکومتي مسوولینو، دیني عالمانو، قومي مشرانو او ځوانانو ګډون کړی و.</p>

<p style="text-align: justify;">د میدان‌وردګو والي قاري بختیار معاذ د ناوړه دودونو ټولنیز، فرهنګي او اقتصادي زیانونه بیان کړل او ټینګار یې وکړ چې د دغو دودونو له منځه وړل یوازې د حکومت دنده نه ده، بلکې پراخې ولسي همکارۍ ته اړتیا لري.</p>

<p style="text-align: justify;">هغه له قومي مشرانو او دیني عالمانو وغوښتل چې په دې تړاو د امیرالمؤمنین د فرمان د تطبیق برخه کې له اسلامي امارت سره بشپړه همکاري وکړي.</p>

<p style="text-align: justify;">د یادونې ده، موده مخکې د اسلامي امارت مشرتابه د ناوړه دودونو مخنیوي په موخه یو فرمان صادر کړ.</p>

<p style="text-align: justify;">دیني عالم مولوي سمیع‌الله وویل چې په ټولنه کې یو شمېر ترسره کېدونکي رواجونه له اسلام سره هیڅ تړاو نه لري او هر مسلمان مسوولیت لري چې د دغو ناسمو رواجونو پر وړاندې غږ پورته کړي.</p>

<p style="text-align: justify;">قومي مشر حاجي عین‌الدین چې د غونډې له ګډونوالو و، وویل، دا ډول غونډې کولای شي په ټولنه کې د ناوړه دودونو مخنیوي ته زمینه برابره کړي.</p>

<p style="text-align: justify;">نوموړي ژمنه وکړه چې په خپله سیمه کې به د دغو منفي رواجونو د له منځه وړو لپاره عملي اقدام کوي او له حکومت سره به اوږه په اوږه ولاړ وي.</p>

<p style="text-align: justify;">هغه وړاندیز وکړ چې باید د مرکز او ولسوالیو په کچه ولس ته پراخ عامه پوهاوی ورکړل شي.</p>