کابل (پژواک، ۱۷ تله ۱۴۰۴): د کورنیو چارو وزارت وایي، د سیاسي چارو شنونکی سلیم پیګیر کابل کې په یوه برید کې ټپي شوی او په تړاو یې یو کس نیول شوی دی.
د کورنیو چارو وزارت ویاند مفتي عبدالمتین قانع پژواک خبري اژانس ته وویل چې پر پیګیر دغه برید نن شاوخوا ۱۲:۳۰ بجې د څلورمې امنیتي حوزې اړوند سیمه کې د هغه په کور کې شوی دی.
قانع وایي، پیګر اوس مهال په کابل ښار کې په یوه روغتون کې بستر دی او د پېښې په تړاو یو تن نیول شوی دی.
هغه د جزئیاتو له ورکولو پرته وویل چې پر پیګیر برید «شخصي انګېزه» لري.
