<p style="text-align: justify;">کندهار (پژواک، ۲۷ لړم ۱۴۰۴): کندهار کې د کرنیزو محصولاتو د کیفیت ارزونې او د ناروغیو د تشخیص لپاره یو معیاري لابراتوار د خصوصي سکټور له لوري د دوه میلیون ډالرو په پانګونه جوړ او نن پرانیستل شو.</p>
<p style="text-align: justify;">نن (سه شنبه) د دغه مرکز د پرانیستې مراسم د رییسالوزراء اقتصادي مرستیال ملا عبدالغني برادر اخند، د عامې روغتیا د وزیر او یو شمېر نورو لوړپوړو دولتي چارواکو په ګډون ترسره شول.</p>
<p style="text-align: justify;">ملا عبدالغني برادر دغه لابراتوار د هېواد د کرنیز سکټور لپاره مهم او بنسټیز پرمختګ وباله او زیاته یې کړه، اسلامي امارت د خصوصي سکټور ترڅنګ ولاړ دی او هڅه کوي چې ورته معیاري لابراتوارونه په ټولو ولایتونو کې جوړ شي.</p>
<p style="text-align: justify;">هغه له صنعتکارانو او سوداګرو وغوښتل چې په رښتینولي او مسلکي تعهد سره خپلې چارې پر مخ یوسي.</p>
<p style="text-align: justify;">مسوولین وايي، په دغه لابراتوار کې به د خاورې، اوبو او سرې معاینات، د کرنیزو محصولاتو کیفیت ارزونه او د افتضد درملو لابراتواري کتنې ترسره کېږي چې دا به د کرنې د حاصلاتو په ښهوالي کې مهم رول ولوبوي.</p>
<p style="text-align: justify;">د لابراتوار له بنسټ اېښودونکو ضیاءالحق وزیرزي وویل، د صادراتي او وارداتي کرنیزو توکو د معاینې ظرفیت به نه یوازې د بزګرانو لپاره د معیاري موادو د کارونې زمینه برابره کړي، بلکې د کرنیزو محصولاتو ارزښت به هم لوړ کړي.</p>
<p style="text-align: justify;">د نوموړي په وینا، دغه مرکز به د هېواد اقتصادي باور زیات او افغانستان به په کرنیزو برخو کې د بهرنیو موادو له اړتیا خلاص کړي.</p>
<p style="text-align: justify;">د سوداګرۍ وزارت معین احمدالله زاهد په دغو مراسمو کې وویل، د تولیدي صنعت برخه کې د روانو اصلاحاتو او هڅو له امله هېواد د اقتصادي خپلواکۍ پر لور روان دی.</p>
<p style="text-align: justify;">هغه زیاته کړه چې د اسلامي امارت په دوره کې د فابریکو شمېر له ۳۰۰۰ څخه ۶۵۰۰ ته رسېدلی او اقتصادي زیربناوې په چټکۍ سره رغېږي.</p>
<p style="text-align: justify;">د کندهار د سوداګرۍ خونې رییس عبدالاحد صدیقي د دغه مرکز پرانیستل د هېواد د پرمختګ لپاره مهم ګام وباله. نوموړي له صنعتکارانو او پانګهوالو وغوښتل چې د امن او مناسب فرصتونو له امله دې په بېړه پانګونه وکړي.</p>
<p style="text-align: justify;">د ده په وینا، کرنه پراخ ظرفیتونه لري او اړتیا ده چې عصري سیسټم ته واوړي.</p>
<p style="text-align: justify;">د کندهار د صنعت او کانونو خونې رییس سید سرور اماني له پاکستان سره د سوداګرۍ په تړاو د حکومت پرېکړه د صنعتکارانو د غوښتنو برخه یاده کړه او ټینګار یې وکړ چې د برېښنا کمښت او د صنعتي پا رک پراختیا هغه مهمې ستونزې دي چې باید حل شي.</p>
<p style="text-align: justify;">هغه وویل، که برېښنا او صنعتي ځمکه برابره شي، د سیمې مېوې به په سرحدونو کې له خرابېدو وژغورل شي او افغانستان به نړۍوالو بازارونو ته د خپل تولید صادرولو توان پیدا کړي.</p>
<p style="text-align: justify;">یاد لابراتوار چې چارې یې په ۱۳۹۷ کال کې پیل شوې وې، د اسلامي امارت په بیا واکمنۍ سره یې د کار سرعت زیات شو او اوس په رسمي ډول ګټې اخيستنې ته وسپارل شو.</p>
