<p style="text-align: justify;">کابل (پژواک، ۱۳ کب ۱۴۰۴): د ملګرو ملتونو سازمان د سرمنشي ویاند د یوناما له قوله ویلي چې د فبرورۍ له ۲۶مې څخه د مارچ تر لومړۍ نېټې پورې پر افغانستان د پاکستان پوځي رژیم بریدونو کې ۳۴ ملکي وګړي شهیدان او ۸۹ نور ټپیان شوي دي.</p>
<p style="text-align: justify;">د ملګرو ملتونو د سرمنشي ویاند سټیفن دوجاریک په یوه خبري غونډه کې ویلي چې په دغو ملکي وګړو کې ښځې او ماشومان هم شامل دي او دا شمېرې لا هم لومړنۍ دي.</p>
<p style="text-align: justify;">هغه څرګنده کړې چې یوناما په افغانستان کې د پاکستان د بریدونو له امله د ملکي تلفاتو د پېښو مستندسازي ته دوام ورکوي.</p>
<p style="text-align: justify;">نوموړي زیاته کړې چې د نښتو له امله په سرحدي سیمه کې د تګ راتګ محدودیتونو د بشري مرستو د بنسټونو او د هغوی د همکارانو وړتیا کمه کړې څو په زیانمنو سیمو کې ژغورونکې او نورې مرستې ورسوي.</p>
<p style="text-align: justify;">هغه ټینګار کړی چې دغه وضعیت له پاکستانه راستنېدونکي افغانان لا زیانمن کړي دي.</p>
<p style="text-align: justify;">دوجاریک همدارنګه ویلي چې له ایرانه افغانستان ته د راستنېدونکو کسانو د شمېر زیاتېدو احتمال هم شته.</p>
