میدان ښار (پژواک، ۴ غبرګولي ۱۴۰۵): د میدان وردګو ولایت د چک ولسوالۍ په عربانو دره کې دوې کوچنۍ نجونې څاه ته د لوېدو له امله مړې شوې دي.
د چک ولسوالۍ مرستیال ولسوال صبغتالله وهاج رسنیو ته ویلي چې دغه پېښه تېره ورځ د عربانو درې اړوند د ځول په کلي کې رامنځته شوې ده.
د هغه د معلوماتو له مخې، له دغو نجونو څخه یوه اته کلنه او بله یو کلنه وه او مړي یې د سیمې د خلکو په مرسته له څاه راایستل شوي دي.
وهاج له خلکو غوښتي چې د کورونو او کرنیزو سیمو څاهګانې خوندي وساتي، څو د ورته دردناکو پېښو مخه ونیول شي.
