هرات (پژواک، ۱۳ سرطان ۱۴۰۵): د هرات امنیه قومانداني وايي چې په دغه ولایت کې د یوه ټکسيچلوونکي د قتل او د هغه د موټر د غلا په تور درې کسان نیولي شوي دي.
د هرات د امنیې قوماندانۍ ویاند ډاکټر سیدمسعود حسینی په یوه خبرپاڼه کې ویلي: «دغه درې کسان شاوخوا یوه اونۍ مخکې مقتول چې د ټکسي موټر چلوونکی و، په دوکه د هرات ښار د څلورمې امنیتي حوزې اړوند د ګردهپارک سیمې ته بیولی او هلته یې د زهري شړومبو په وسیله بېهوښه کړی و؛ وروسته یې د هغه موټر او نور وسایل غلا کړي، نوموړی یې وژلی او په پټه یې په هماغه سیمه کې خښ کړی و.»
هغه زیاته کړې چې امنیتي ځواکونو له پلټنو وروسته د جسد د خښېدو ځای معلوم کړ، لومړی یې یو شکمن کس تېره ورځ په هرات ښار کې ونیوه. د هغه په خبره، دوه نور شکمن کسان هم هغه مهال ونیول شول چې غوښتل یې د نیمروز ولایت له لارې له هېواده وتښتي او وروسته د نورو څېړنو لپاره هرات ته ولېږدول شول.
حسيني وايی، نیول شوو کسانو د پلټنو پر مهال پر خپل دغه جرم اعتراف کړی او د دغه کار انګېزه یې د موټر او د مقتول د مالونو غلا بللې ده.
هغه ویلي چې د نیول شوو کسانو دوسیې به له لومړنیو پړاوونو وروسته عدلي او قضايي ارګانونو ته وسپارل شي.
