کابل

د کابل امنیه قومانداني وايي چې د درېیمې حوزې پولیسو شپږ کسان له ۲۲ زره «ذیګپ» ګولیو سره یوځای نیولي دي.

د مالیې وزارت وايي چې د دغه وزارت د دولتي املاکو لوی ریاست له لوري د کابل د بګرامیو ولسوالۍ نساجي فابریکې ته مخامخ له ۳۲۵ جریبه غصب شوې ځمکې څخه ۵۰ جریبه یې بېرته راوګرځول شوه او د پاتې ځمکې په بېرته راګرځولو کار روان دی.

د ازموینو ملي اداره وایي چې کابل کې د کانکور ازموینه د ۱۵ زره کسانو په ګډون واخیستل شوه.

د کابل امنیې قوماندانۍ د اختر ورځو کې د امنیت له تامینه ډاډ ورکړی او له خلکو یې غوښتي چې په دې ورځو کې دې له هوایي ډزو، د پټاکیو او پلاستیکي وسلو له پېر او پلوره ډډه وکړي.

د افغانستان د ترانسپورټ او هوایي چلند وزارت وايي چې ایران‌ایر هوايي شرکت په لومړي ځل کابل ته خپلې الوتنې پيل کړې.

د کلیو پراختیا او بیارغونې وزارت وایي چې په هرات، خوست او کابل ولایتونو کې د نږدې ۱۴ میلیون افغانیو په لګښت د اوبو رسولو دوو شبکو او یوه چک‌ډیم جوړولو چارې بشپړې شوې.

د کابل امنیه قومانداني وايي چې له نشه‌يي توکو سره د مبارزې پولیسو یو کس له ۲۶۲ کیلوګرام چرسو او څلور نور کسان له څلور زره زیکپ ګولیو سره نیولي دي.

د کورنیو چارو وزارت وايي چې پولیسو په کابل ښار کې یو کس د خلکو پر مرګ ګواښلو او باج اخیستنې او اته نور کسان د غلا په تور نیولي دي.

د پوهنې وزارت وایي چې د کابل ښار اړوند د بېلابېلو ښوونځیو د ۳۳ لوبډلې ترمنځ د فوټبال سیالۍ پیل شوې.

د لوی اختر په رانږدې کېدو سره د کابل ښاروالي د ښار په بېلابېلو ناحیو کې د څارویو پېر او پلور ته د ځانګړو ځایونو له ټاکلو خبر ورکوي او وايي، له ټاکلو ځایونو پرته په نورو ساحو کې د څارویو پېر او پلور منع دی.

د کابل ولایت په پغمان ولسوالي کې د دوو کورنیو ترمنځ ۲۲ کلنه دښمني چې پر مهال یې له دواړو لورو یوولس کسان وژل شوي، د مسوولینو، علماوو او قومي مشرانو په منځګړیتوب په دوستۍ بدله شوه.

کابل ښار کې د تېرو اوو ورځو په پرتله د امریکايي ډالر پر وړاندې د افغانۍ ارزښت لوړېدو ترڅنګ، د پټرولو، اوبلن ګاز، قزاقي اوړو، غوړو او د سرو‌زرو بیې ټیټې شوې دي.