جلال اباد ( پژواک، ٥ وږى ٩١) : د حج اوقافو وزارت له لوري د نږدې لس ميليونه افغانيو په لګښت د ختيځو ولايتونو د حاجيانو لپاره د روزنيز مرکز او کنفرانسونو تالار بنسټ ډبره د وږي په پنځمه په جلال اباد ښار کې کېښودل شوه.
د ننګرهار د حج او اوقافو رييس مولوي عبدالعزيز خيرخواه پژواک خبري اژانس ته وويل،چې دا ودانۍ د ختيځ زون په حج کمپ کې کابل اډې ته څېرمه جوړېږي.
هغه زياته کړه، چې د ودانۍ لګښت د اوقافو وزارت له انکشافي بوديجې څخه ورکړل شوى او په يوولس بېسوو ځمکه کې به ي ې چارې بشپړې شي.
مولوي خيرخوا وويل،چې په دغه مرکز کې به هر کال د کونړ، لغمان، نورستان او ننګرهار ولايتونو د حج د فريضې ادا کوونکو ته عملي روزنه ورکول کېږي او ددغو څلورو ولايتونو د اوقافو رياستونه به په کې علمي غونډې جوړوي.
د مولوي عزيز په وينا، نوې ودانۍ به په يوه پوړ کې له دوه زرو تنو څخه د زياتو کسانو د ځايولو وړتيا ولري، چې ترڅنګ به يې پخلنځى او تشنابونه هم ولري.
د پروژې مسوول حاجي فاروق وويل،چې د حج او اوقافو رياست د کمپليکس ډيرې چارې يې وار له مخه ترسره کړې دي، چې د دوه کلونو پر ځاى به يې چارې په يو نيم کال کې بشپړې کړي.
نوموړي زياته کړه، چې د حاجيانو د تالار ودانۍ به په ښه معيار برابره جوړه شي.
حاجي فاروق زياته کړه،دې ته ژمن دى، چې د رغونې چارې به يې هېڅ ډول نيمګړتياوې ونه لري.
د ننګرهار مرستيال والي محمد حنيف ګرديوال پژواک ته وويل، چې تر دې وروسته به د ختيځې سيمې حاجيان په ښار کې د کرايي خونو په نيولو او خوراک څښاک پسې نه وي سرګردانه .
نوموړي ډاډ ورکړ، چې د اوقافو رياست د کمپليکس او ودانيو په جوړيدو سره به نه يواځې د حاجيانو ، بلکې د سيمې د علماوو او اوقافو رياستونو ګڼې ستونزې هوارې شي.
د يادونې ده ، چې له يوه کال راهيسې د جلال اباد ښار په پنځه ويشت جريبه ځمکه کې د حج کمپ چارې هم پيل شوي، چې د حاجيانو د روزنې لپاره به پکې د حج د سپېڅلو ځايونو موډلونه هم کېښودل شي.
