ايبک ( پژواک، ٩ تله ٩١): د سمنګانو د عدليې رياست ودانۍ د المان په شاوخوا ٤٠٠ زره امريکايي ډالره مرسته جوړه او نن ګټې اخيستنې ته وسپارل شوه.
ددې ولايت د عدليې رييس تاج محمد غفوري د معلوماتو له مخې، دغه ودانۍ په ٢٦٠٠ متره مربع ځمکه کې جوړه شوې او دوه بلاکونه لري.
دده په وينا، لومړى بلاک ١١ ادارې خونې، تحويلخانه او د غونډو تالار لري او دويم بلاک يې د ماشومانو د تربيې او اصلاح امريت اړوند دى .
د هغه د څرګندونو له مخې، دغه ودانۍ د المان د انکشافي همکاريو موسسې ( جي اى زيد) په مالي مرسته په يوه کال کې جوړه شوې ده .
تر دې دمه دې رياست په کرايي خونو کې فعاليت کاوه.
د عدليې وزير حبيب الله غالب ددې ودانۍ د پرانېستو په مراسمو کې ګډون درلود.
هغه د المان له يادې مرستې مننه وکړه او هيله يې څرګنده کړه ، چې په راتلونکې کې هم له افغانستان سره خپلو مرستو دوام ورکړي.
د سمنګانو والي خيرالله انوش وويل ، چې په تېرو شاوخوا لسو کلونو کې ددې ولايت د ٧٥ سلنه ادارو لپاره نوې ودانۍ جوړې شوې دي .
دده په وينا، دا مهال د مستوفيت ، معادنو او ځينو نورو ودانيو د جوړېدو کار روان دى .
