کابل(پژواک١٤مرغومى٩١) : له ازادو رسنيو د ملاتړ اداره (نى) اندېښنه لري ، چې له ٢٠١٤کال وروسته به د ځينو ” متحجرو او متعصبو کسانو او بنسټونو” لخوا پر رسنيو او خبريالانو محدوديتونه وضع شي .
ددې ادارې مشر صديق الله توحيدي نن په کابل کې خبريالانو ته وويل ،کېداى شي چې په ٢٠١٤کال کې د بهرنيو ځواکونو تر وتلو وروسته په افغانستان کې پر خبريالانو او رسنيو محدوديتونه وضع وشي .
ده د يادو اشخاصو او بنسټونو په اړه نور معلومات ورنکړل، خو خبريالانو ته يې په خطاب کې وويل : (( له ٢٠١٤کال وروسته د خبريالۍ په برخه کې بايد موږ د ډېر فشار لپاره چمتوالى ولرو.))
توحيدي وايي ، په دې باور نه دى ، چې تر ٢٠١٤ کال وروسته به په افغانستان کې بل نظام رامنځته شي، خو وايي،چې خبريالانو او رسنيو ته به ځينې ستونزې پيدا شي .
ټاکل شوې ، چې په ٢٠١٣ کال کې له بهرنيو ځواکونو افغان ځواکونو ته د مسووليتونو د لېږد لړۍ بشپړه او په ٢٠١٤ کال کې بهرني ځواکونه له افغانستان څخه ووځي .
د خپرو شويو راپورونو له مخې، دا مهال په افغانستان کې ٥٨ تلويزيونونه ، ١٤٥راډيوګانې ، شاوخوا ٨٠٠ چاپي رسنۍ او يو شمېر خبري اژانسونه فعاليت کوي .
د توحيدي د معلوماتو له مخې، له يادو رسينو څخه ١١تلويزيونونو او ١٢ راډيو ګانو په ٢٠١٢ ميلادي کال کې فعاليت پيل کړى دى .
دى وايي ، چې په ياد کال کې له کابل څخه خپرېدونکې ” طرف اونيزه” د ولسي جرګې د ځينو غړو د فشارونو له امله له فعاليت څخه لوېدلې او د هرات ” اتفاق اسلام” ورځپاڼه د مالي ستونزو له امله د يوې مودې لپاره تړل شوې وه .
د توحيدي په وينا ، په افغانستان کې تېر ميلادي کال کې هم رسنۍ او خبريالان د نورو کلونو په څېر له امنيتي ، مادي او د رسنيو په ادارو کې له کورنيو ستونزو سره مخ وو.
هغه وايي ، چې معلوماتو ته د لاسرسۍ د قانون مسوده د عدليې وزارت لخوا وروستۍ شوې او ډېر ژر به د وزيرانو شورا ته وړاندې شي .
دده په وينا، کله چې ياده مسوده په قانون بدله او پلې شي بيا نو دولتي مسوولين نه شي کولى ،چې له خبريالانو څخه معلومات پټ کړي.
هغه زياته کړه ، چې په رسنيو کې د کار مقرره هم د اطلاعاتو او فرهنګ وزارت لخوا برابره او عدليې وزارت ته استول شوې ده .
دى وايي، چې عدليې وزارت به دغه مقرره هم ترڅيړنې وروسته د وزيرانو شورا ته د تصويب په موخه وړاندې کړي .
دى وايي ،چې د يادې مقررې په تصويبدو سره به د رسنيو د مالکانو او خبر يالانو ترمنځ په تړون ، له کار څخه ګوښه کېدو ، امتيازونو او نورو برخو کې ډيرې ستونزې له منځه يوسي .
ده وويل ، چې په هيواد کې ډيرې رسنۍ خبريالانو ته ترانسپورټي اسانتياوې نه برابروي ، تقاعد نه ورکوي او دناروغۍ پر مهال او يا هم په نورو اړينو وختونو کې رخصتي هم نه ورکوي.
هغه زياته کړه : ” په ځينو وختونو کې د رسنيو د مالکانو لخوا له خبريالانو سره داسې تړونونه کيږي ، چې ان پکې بشري حقونه هم نقض کيږي .”
خو توحيدي په دې اړه کومه بېلګه وړاندې نه کړه .
