اسعداباد-کابل (پژواک ٢٦ زمرى ٩٢): د وسله والو طالبانو په يوه بريد کې اوه عام وګړي ټپيان شوي، بلخوا امنيتي چارواکو په بېلابېلو پېښو کې لسو وسله والو ته د مرګ ژوبلې اوښتو خبر ورکړى دى.
د کونړ ځايي چارواکي وايي، چې د دغه ولايت په څوکۍ ولسوالۍ کې د وسله والو طالبانو په يوه بريد کې د څلورو ښځو په ګډون اوه عام وګړي ټپيان شوي دي.
د څوکۍ ولسوال شاه خسرو د زمري په ٢٦مه پژواک خبري اژانس ته وويل، چې وسله والو طالبانو نن سهار په دې ولسوالۍ کې د سيمه ييزو پوليسو پر يوې پوستې د هاوان بريد کړى و.
هغه زياته کړه، د هاوان مرمۍ د سيمې د يوه اوسېدونکي نصرالله پر کور لګېدلې چې له امله يې څلور ښځې او درې سړي ټپيان شوي دي.
د ولسوال په وينا، ټپيان روغتون ته لېږدول شوي، خو د دوو ټپيانو روغتيايي حالت د اندېښنې وړ ښودل شوى دى.
بلخوا په دغه ولايت کې د ملي اردو د دويمې لوا وياند جګړن هارون يوسفزي پژواک ته وويل، چې تېره شپه په دانګام ولسوالۍ کې د ملي اردو ځواکونو د عملياتو پر مهال درې وسله وال طالبان وژل شوي دي.
وسله والو طالبانو تر اوسه د يادو پېښو په اړه څه نه دي ويلي.
د يوه بل خبر له مخې، د ميدان وردګو ولايت چارواکو هم اوو طالبانو ته د مرګ ژوبلې اړولو خبر ورکړى دى.
د والي وياند عطاء الله خوګياڼي پژواک ته وويل، د جلرېز ولسوالۍ په بېلابېلو کليو کې د ملي اردو ځواکونو له خوا تېره شپه عمليات ترسره شوي، چې په ترڅ کې يې څلور وسله وال طالبان وژل شوي او دوولس تنه شکمن نيول شوي دي.
د هغه په وينا، دغه راز په جغتو ولسوالۍ کې هم د يوې نښتې په ترڅ کې يو وسله وال طالب وژل شوى او دوه پاکستاني طالبان ټپيان شوي دي.
وسله والو طالبانو تر اوسه په دې اړه څه نه دي ويلي.
