کابل (پژواک، د تلې لومړۍ نېټه ٩٢): ټاکل شوې سبا د “اسلام او سولې” تر سرليک لاندې د عالمانو يو ورځنی نړيوال اسلامي کنفرانس په کابل کې جوړ شي.
دا څرګندونې د افغانستان د سولې شورا وياند مولوي شهزاده شاهد پژواک خبري اژانس ته وکړې.
ده وويل، دا ناسته چې د افغانستان د عالمانو شورا او سولې عالي شورا په نوښت په لاره اچول شوې، د هر هېواد استازى به د اسلام له نظره د سولې پر اهميت او ارزښت خبرې وکړي.
ده زياته کړه، همدارنګه به د سيمې د ستونزو او په افغانستان کې د سولې او تلپاتي ثبات د راوستو په اړه هم بحث وشي.
د شاهد د معلوماتو له مخې، په دې نړيواله يوه ورځنۍ غونډه کې به د اسلامي نړۍ، لکه پاکستان، ايران، هند، اندونيزيا، ماليزيا، مصر، ترکيې او سعودي عربستان ډېرى استازي او عالمان ګډون وکړي.
د هغه په وينا، د غونډې مشري به د افغانستان د عالمانو شورا مشر مولوي قيام الدين کشاف او پرانيستونکې وينا به د سولې عالي شورا مشر صلاح الدين رباني کوي.
نوموړى وايي، غونډه به د سهار په نهو بجو پيل او مازديګر پنځه بجې به پاى ته ورسېږي.
