پل علم( پژواک،١١ لړم ٩٢): د لوګر مرکز پل علم ښار اوسېدونکي او چارواکي وايي، د لوى اختر په ورځ د پل علم په جامع جومات کې تر چاودنې وروسته د لمانځه لپاره دې جومات څوک نه ورځي.
دوى زياتوي، چې دې جومات ته به د جمعې د لمانځه لپاره سلګونه خلک ورتلل، خو اوس نه د لمانځه لپاره څوک ورځي او نه ملا امام او موذن لري.
دا د لوګر ولايت په کچه تر ټولو لوى جومات دى، چې په يو وخت سلګونه کسان په کې لمونځ کولى شي.
د پل علم ښار يو تن هټيوال ګلاب خان پژواک اژانس ته وويل، هر ورځ به د ماسپښين، مازيګر او ماښام لمانځه ته جامع جومات ته ورتلل، خو د اختر ورځې له چاودنې او د والي ارسلا جمال تر وژل کيدو وروسته جومات ته څوک نه دي ورغلي.
د پل علم يو بل اوسېدونکى حبيب الله هم وايي، چې د لوى اختر له چاودنې وروسته بيا جومات ته څوک نه دي ورغلي.
نوموړى زياتوي، که جومات ملا امام نه لري، نو بل دې ونيول شي ، تر څو لمونځ کوونکي جامع جومات ته ورشي.
د ولايت يوتن اداري مامور جمعه ګل وايي، د ولايت ټول مامورين د ماسپښين لمانځه لپاره جامع جومات ته ورتلل، خو د اختر له ورځې وروسته څوک نه دي ورغلي.
لمونځ کوونکي د حج او اوقافو له رياست او سيمه ييزو چارواکو غواړي، چې د چاودنې وروسته د جومات زيانمنې شوې برخې او هندارې ورغوي او په جومات کې د قران کريم ختم وکړي.
د لوګر مرستيال والي محمد هاشم فيضي هم دامني، چې جامع جومات ته اوس څوک نه ورځي او ښايي لامل يې ويره وي.
هغه زياتوي، دوى د هيچا مخه نه ده نيولې، هر څوک کولى شي له ستونزې پرته خپل لمونځ په جومات کې وکړي.
فيضي زياته کړه، د جومات ملا اما صديق الله د اختر ورځې له پېښې وروسته نامعلوم ځاى ته تښتېدلي او تر دې مهاله يې ځاى ځايګى نه دى معلوم.
د لوګر د جامع جومات ملا امام مولوى صديق الله د لوګر د سولې شورا د دفتر د عامه اړيکو مسوول هم و.
پژواک اژانس هڅه وکړه ، چې په دې اړه د لوګر د حج او اوقافو رياست نظر واخلي ، خو بريالى نشو
د پل علم په جامع جومات کې د لوى اختر په ورځ چاودنې والي ارسلا جمال وواژه او شاوخوا ١٥ تنه نور يې ټپيان کړل.
د دې جومات موذن او خادم د چاودنې په ورځ امنيتي ځواکونو ونيول او د جومات ملا امام نامعلوم ځاى ته وتښتېد.
