منځپانګې ته تلل
سه‌شنبه ۱۷ نومبر ۲۰۲۶ · کابل ۱۲:۵۷ غ.و
۱۳°صاف · ↑۱۴° ↓۰°د هوا کیفیت: منځنی

د هېواد د سړو سيمو د ښوونځيو ازموينې د لړم په ٢٥ مه پيليږي

· ۱ دقیقه لوستل · ۷۶ کتنې

 کابل (پژواک ١٢ لړم ٩٢): د هېواد د سړو سيمو د ښوونځيو له لومړي څخه تر شپږم ټولګيو پورې ازموينه به د لړم په ٢٥ مه او له اووم څخه تر دوولسم ټولګيو ازموينې د ليندۍ په لومړۍ نېټه پيليږي.

 دغه مطلب د پوهنې وزارت له لوري پژواک خبري اژانس ته په يوه رالېږل شوې خبرپاڼه کې څرګند شوى دى.

 په خبرپاڼه کې راغلي، چې د لومړنۍ دورې ازموينې به د لړم مياشتې تر پايه او د منځنيو او ثانوي دورو ازموينې به د ليندۍ مياشتې تر ١٥ مې نېټې پورې دوام وکړي.

سرچينې ويلي، چې د هېواد خصوصي ښوونځي هم د دغې خبرتيا تابع دي.

د پوهنې وزارت، تر دې مهاله د ګرمو سيمو ولايتونو ښوونځيو د ازموينې په اړه څه نه دي ويلي.

په هېواد کې د خصوصي ښوونځيو تر څنګ، ټولټال ١٦٦٠٠ دولتي ښوونځي شتون لري.

 د دغه وزارت د معلوماتو له مخې، يواځې په دولتي ښوونځيو کې له ٩ ميليونو زيات زده کوونکي پر زده کړو بوخت دي.