کابل ( پژواک، ٦ کب ٩٢ ) : د مدني ټولنو لسګونو کسانو په کابل کې د ملي اردو د وژل شويو سرتېرو په ياد شمعې بلې کړې او د ګلونو ګيډۍ يې کېښودې.
وړمه ورځ د کونړ په غازى اباد ولسوالۍ کې د ملي اردو پر يوه پوځي مرکز د وسله والو طالبانو په ډله اييز بريد کې ٢٠ تنه د ملي اردو سرتېري ووژل شول او څو تنه نور يې لادرکه دي.
ددغو افغان سرتېرو جسدونه تېره ورځ کابل ته راوړل شو او د ځانګړو مراسمو په ترڅ کې د هغوى کورنيو ته وسپارل شول.
د مدني ټولنو لسګونو کسانو د کب په ٦مه، تر ماښام وروسته د کابل ښار په عيدګاه جومات کې د يادو سرتېرو په ياد کې شمعې بلې کړې او د ګلونو ګيډۍ يې کېښودې.
په دې سيمه کې تر يوه ساعت وروسته د ملي اردو د وژل شويو سرتېرو د کورنيو ديو شمېر غړو په ګډو دوى د محمود خان پول څلور لاري ته وړل او هلته يې هم شمعې بلې او د ګلونو ګيډې کېښودې.
په لاره کې دغو کسانو د ملي اردو د ملاتړ او دهېواد ددښمنانو پر ضد يې شعارونه ورکول .
د وژل شويو سرتېرو کورنيو له ځانه سره شعارونه درلودل، چې په يوه کې ليکل شوي وو : (( ولسمشر حق نه لري چې د افغانانو قاتلينو ته دورورڼو خطاب وکړي.))
د مدني ټولنې يوه فعال محمد داوود پژواک خبري اژانس ته وويل چې دوى دغه کار د وژل شويو سرتېرو کورنيو سره د همدردۍ په توګه ترسره کړ.
هغه زياته کړه چې دوى هېوادوال ددغو سرتېرو کورنيو سره په دې غم کې شريک دي.
د مدني ټولنې يوه بل فعال جاوېد غفور وويل چې د ملي اردو سرتېرو د هېواد لپاره قربانۍ ورکړي او ټول هېوادوال يې کلک ملاتړ کوي.
په دې مراسمو کې د کابل امنيه قوماندانۍ او ديو شمېر کانديدانو د کمپاين استازو هم ګډون درلود.
