لښکرګاه (پژواک ٦ تلې ۹۳): د هلمند پېژندنې د سيمينار د هر اړ خيزو مقالو ټولګه ”زما هلمند” له چاپه راووته.
د دغه کتاب مقالې يو شمېر ليکوالو د هلمند پېژندنې په سيمينار کې لوستلي او په دغه ولايت کې د پژواک خبري اژانس خبريال زين الله ستانکزي راټولې کړې دي.
ستانکزي پژواک خبري اژانس ته وويل چې ”زما هلمند” په نوم دغه کتاب د استاد محمداصف صميم او استاد حبيب الله رفيع پر سريزو سربېره ٤٩ مقالې لري.
ده زياته کړه: ((هلمند تاريخي ولايت دى؛ که څوک غواړي چې په اړه يې ښه معلومات ولري نو د دې مقالو ټولګه دې ولولي.))
هغه وايي، د ياد کتاب مقالې د هلمند د اوسني تاريخ تر څنګ پر امنيتي مسايلو، اقتصادي اړخونو، کرنيز سکټور، جغرافيايي موقعيت په تړاو پر څېړنو راڅرخي.
ستانکزى زياتوي: ((په دغه کتاب کې د سيمې ګړدودونه، سيمه ييز دودونه، د بهرنيانو راتګ، کانونه او د تاريخي ميراثونو په اړه څېړنې دي.))
د هلمند د اطلاعاتو او کلتور رييس عليشاه مظلوميار وويل چې په ”زما هلمند” کتاب کې د هلمند د لرغوني او معاصر تاريخ په تړاو څېړنې شوې چې نورو څېړونکو ته به د ليکنو پر مهال ښه سرچينه وي.
په هلمند کې د پګړۍ مجلې مسوول محمداسماعيل شريعت يار پژواک ته وويل، د هلمند په تاريخ کې د دغه کتاب چاپ ځانګړى ارزښت لري.
د يادولو ده چې د هلمند په اړه سيمينار د روان کال د غبرګولي مياشتې په دويمه په لښکرګاه کې ترسره شوى و چې ګڼو ليکوالو او شنونکو په کې برخه لرله.
