کابل (پژواک) – د رویټرز د راپور له مخې، د فرانسې چارواکو د ایران سپاه پاسداران ځواک د تېرې اکتوبر میاشتې د هغه سایبري برید مسوول بللی چې له امله یې په ټوله فرانسه کې په سوپرمارکېټونو کې د یخچالونو او فریزرونو سیسټمونه له کاره لوېدلي وو.
راپور کې د فرانسې د چارواکو له قوله راغلي: «د یادو بریدونو په تړاو له ایران سره حساب وشي.»
د فرانسې د بهرنیو چارو وزیر ژان نوئل بارو ویلي چې د ایران سفیر یې د دغو بریدونو په تړاو احضار کړی او خبرداری یې ورکړی چې اروپايي ټولنه ښايي پر ایران نور بندیزونه هم ولګوي.
د راپور له مخې، د اکتوبر په ۱۱مه سایبري بریدونو د فرانسې په سلګونو سوداګریزو مرکزونو او سوپرمارکېټونو کې د یخچالونو د تودوخې د کنټرول سیستمونه ګډوډ کړل. د ځینو یخچالونو تودوخه دومره لوړه شوې وه چې اور یې هم اخیستی و.
د دغو بریدونو له امله د سوپرمارکېټونو کارکوونکي اړ شوي چې خرابې شوې غوښې او ویلې شوې آیسکریم لرې کړي؛ د راپور له مخې، د دې زیانونو ټول لګښت ښايي لسګونو میلیونو یورو ته ورسېږي.
رویټرز لیکلي، روانه میاشت کې د سایبري بریدونو په دویمه څپه کې هم د اروپا له سلو څخه زیات سوداګریز مرکزونه اغېزمن شوي او په فرانسه کې یې د وینې د ساتلو ځینې یخچالونه هم اغېزمن کړي دي.
د راپور له مخې، د امریکا د پوځ په لږ تر لږه شپږو تدارکاتي پلورنځیو کې هم د اګست په میاشت کې یخچالونه له کاره لوېدلي وو. د امریکا دفاع وزارت دغه پېښه د احتمالي سایبري برید په توګه څېړي او ایران یې د شکمنو لورو په ډله کې ګڼلی، خو د فرانسې او اروپا له بریدونو سره یې د دغې پېښې تړاو لا نه دی تایید شوی.
