کابل (پژواک، ٢٧ مرغومى ٩٣): افغان حکومت د شارلي ابدو په طنزي مجله کې د اسلام د پيغمبر حضرت محمد(ص) د نوي کاريکاتور خپرول پر سختو ټکو غندلي دي.
ولسمشرۍ رياست د يوې خبرپاڼې په خپرولو سره ويلي چې د بيان ازادي بايد له يو بل سره د سوله ييز ژوند او د دينونو تر منځ د لا زيات تفاهم لپاره وکارول شي.
په خبرپاڼه کې د ولسمشر له قوله راغلي چې د داسې کاريکاتور خپرول د اسلام مقدس دين او د نړۍ مسلمانانو ته سپکاوى دى.
خبرپاڼې زياته کړې چې ولسمشر غني د افغانستان د خلکو په استازولۍ دغه سپکوونکى عمل غندي او مقدساتو ته سپکاوى په بشپړه توګه يو غير مسوول عمل بولي.
د افغانستان ولسمشر وايي: ((د بيان ازادي بايد يو له بل سره د سوله ييز ژوند او د دينونو ترمنځ د لا زيات تفاهم لپاره وکارول شي.
د ولسمشر په خبره، افغانستان د بل هر هېواد په پرتله کلونه کلونه له جګړې او تاوتريخوالي ځورېدلى، نو ځکه د نورې نړۍ د خلکو په پرتله همپالنه او تفاهم په ښه توګه درکولى شي.
د شارلي ابدو مجلې پر دفتر له بريد وروسته دغه طنزيه مجلې يو ځل بيا په خپله نوې ګڼه کې د اسلام د ستر پيغمبر کاريکاتور خپور کړى دى.
د مرغومي په ١٧مه يو شمېر وسله والو چې ويل يې”د پيغمبرغچ يې واخيست” چې د شارلي ابدو طنزي مجلې د ليکوالو په ګډون يې ١٢ کسه ووژل.
د دغه بريد مسووليت د القاعدې د يمن څانګې پر غاړه واخيست.
د اسلام د پيغمبر د کاريکاتور چاپ د اسلام مبارک دين له نظره سخت سپکاوى ګڼل کېږي.
